بريكوراما المتروك و حق الخدام المفكوك

ليوم وعلى غير العادة خرجت باش نقضي قضيات الدار و عندي شويا تصليحات باش نعملهم و نشري شويا كوب و تريونڨلوات قلت نمشي لبريكوراما ما فماش ما خير و غادي الصدمة الكبيرة:

كاسة وحدة تخدم و الكاسيار من كثر ما فماش خدمة قاعدة تطلفح من بلاصة لبلاصة

ما فما حتى شي في بلاصتو وكل شي مطيش و خارج على باكواتو

اكثر من شطر الريونات فارغ ما فيه شي

الاثاث لكل مكسر و معفوس بالساقين و مطشوش بالكلور

لوح قيمتو ملاين كلاه السوس

الريونات باش اطتيح و البنية لكل ريحتها تخنق بالندا

وانا خارج حكيت شويا مع الكاسيار الي قالتلي الي عندهم 3 شهور ما خلصوش و بريكوراما ماعادش فيها متصرف قضائي و وكالة بلاش بواب وكل شهر يقولوهم الشهر الجاي تو نجيبو متصرف 

بالطبيعة ما لقيت شي ملي حاجتي بيه و خذيت حكايات تافهة قيمتهم اقل من 10 دينارات وقت الي خلصتها وحليت الكاسة ما فيها كان زوز صوردي صرف 

من كلام الكاسيار فهمت الي الخدامة لكل هجت قعدت هيا و شويا تلفت نلقاهم يتعدو على الصوابع جايبين صغيراتهم و قاعدين في الكراسي الي نورمالمون للبيع يحكيو يقصرو في الوقت كان ماهمش يركبو في الفطور جملة وحدة

حاولت ناخو شهادة ناس تخدم غادي ولا تصاور ما نجمتش و ما فما ما يتصور !

Views