شنوا فعالية المبادرات الشبابية ؟

باش نحكي شويا على فعالية المبادرات الشبابية الي قاعدين يقومو بيها البعض كيما حكومتنا، والشباب يقرر و الكار الي قاعدة اتدور على الجمهورية باش تلم تصحاحات متع شباب يساند الفكرة

حكومتنا الي بدات بناس عندها ما تقول في روحها تحب تخدم بلاش والا بالشهرية الي يتقاضاو فيها في خدمهم بدون اي امتيازات و الموجة هذي غطار عليها موجة ما اكبر من التنبير و تعدات في وسطها من غير ما تاخو المنحى الي حاجتها بيه و كيف ما يقولو ما ينقب عين الفلوس كان خوه

الشباب يقرر الي هي كانت مجموعة من الشباب الي حبو يوصلو صوتهم وبدات الفكرة من اعتصام باردو و كنت معاهم و نعرف الخدمة المزيانة الي كانو يخدمو فيها اما اندساس بعض العناصر الغير فعالة والي ما عطات شي و فيبالها مجرد الانتساب باش يعملو شويا شهرة باش ينفعهم ياخي لا نفعهم لا نفع الحركة، الحركة هذي متواصلة لاكن مع الاسف نخبوية برشا و ماهيش قاعدة تقرب للشباب لكل و الوسائل المستعملة ماهيش متاحة للناس لكل كيما التطبيقات على الهواتف الذكية و الفازات من النوع هذا الي كانت تنجم تتعوض بدقان البيبان و العمل الميداني و التوعوي في صفوف الشباب المهمش خير

واخرهم الكار الي قاعدة اتدور على وليات الجمهورية لمحاولة اقناع العباد بجدوى انو الشباب ياخو قرارو، التوعية ما تكونش بكلمتين وقص التوعية هو عمل دائم كيف ما انت اقنعتو في دقيقتين انو يصحح على العريضة ينجم يجي مبعد شكون يقنعو بانو الشياب ادرى بلي صاير والخبرة و الشي و الكذا و وقتها ما عملنا شي والخدمة لكل طاحة في الماء، هاك المصروف متع الكار و الوتلة و المحواس و الطلفيح كان بيه عمل قاعدي في كل ولاية، في كل ولاية شاب ولا مجموعة شباب يعملو دورات نصف شهرية يلمو شباب المنطقة و يوعيهم بدورهم في هالفترة الحساسة وكل واحد على حسب قدراتو باش ينجم ينفع مدينتو وبالتالي بلادو 

في الاخر هذي وجة النظر متاعي والعقل المستعان

Views