بالطبيعة التونسي اول ما يحل عينيه يحل معاهم الفايسبوك باش يشوف شما جديد في الدورة الاولة نلقى شباب من الجنسين يحطو في سيراتهم الذاتية الي ماهيش دونية جملة و يحبو يقدمو خدماتهم بلاش للبلاد ....
الشباب هذم متحصلين على اكبر الشهايد في اكبر الجامعات عبر العالم و عندهم خبرات لاباس بيها في الميادين متاعهم و كيف هوما قلبهم على تونس و يحبو يعاونوها ما فيها باس نشجعهم مع انو انا مقتنع الي مش باش يتلفتلهم حد ولا يسمعهم حد ... علاش ؟
مع كومة النبارة الي ما عندها ما تصنع بخلاف التمجليغ على الفايسبوك ، عباد ندات بيهم كراسيهم من كثر ما يتحركوش من بلايصهم و عاملين الريحة بجريان الجوف متاعهم .. ما خلاو حد يقرى و لا يسمع ولا يحاول يوصل صوت واحد مالشباب الي تحب تعاون البلاد !
بالطبيعة مدام حاصر الدنيا لكل في عالم افتراضي و ورا جرد "" وفيبالو الدنيا لكل محصورة في فايسبوك وقت الي ندادو قادعد تقرى و تحاول اطور رواحها باش تلقى باش تنفع بلادها وبلاش و هو قاعد يحاول يبيع في التنبير متاعو بالفلوس !
مبعد ما يفوت الفوت و يركبو علينا الشياب و المسوسين و الشباب يقعد ملوح و يمشي يبيع مخو للبراني يجي يحكي و يحلل و يناقش و جايبها فهيم و يقلك نحنا شباب محڨور و درا شنوا و هات من هاك اللاوي ...
ونسا روحو وقت الي الشباب حب يقرر هو قال هاي خبيزة جديدة انبرو عليها و ما خممش حتى طرف في مصلحة بلادو و مصلحتو هو قبل كل شي و يبدى عاد كل ذكرى يبكي وينوح على سعدو و سعد تونس الي هو كبهم باديه !
ما فهمتش وقتاش باش تتبدل العقلية الزبالة ويفهم الشباب التونسي الي لاسزمو يفك بلاصتو وحدو ما يستنا حد يعطيه حاجة ...
الجماعة الي تنبر و جايبينها زبابر تهبلو ... حاولو انتوما زادة تهبطو سيركم الذاتية الحقيقية مشع المساطة متاعكم و حاولو تقارنو رواحكم باندادكم تو تحشمو على رواحكم و تفهمو انو العقد متاعكم هي الي خلاتكم تنبرو عليهم !
ناس عندها سنين تجاهد باش توصل بعلمها و نبارة ناس كيفكم ما عندها باش تضرهم ...
Aucun commentaire:
Enregistrer un commentaire