تقوم ناقص نوم ... تلقى روحك معدي 4 سوايع نوم فيهم درجين منقوبين قمت تشرب و المرة الثانية مشيت للتوالات ... تبدى تطايح كيف السكران ... تلوج على يد الباب متع التوالات بش تدخل تغسل حالتك ... تتكى درجين على اللافابو ماك تعم في شي ... تحل السبالة تجس الماء يلكعك البرد تفيق شويا ... تتذكر الي لازمك تزرب ماشي تخدم ... تغسل وجعك و سنيك و اطرافك في درجين لعب تلبس حوايجك مبين الصالة و الكوجينة ... تخرج ...
اما باز ترجع من شطر الثنية نسيت تاليفونك ... تطلع مكهرب فالمتور ... مكشبر و خنافرك طالعة ... يشوفوك الشواطن يستعوذو ... تهبط في برشلونة ... تحس روحك في قندهار .... الفييييييييييييين .... ميتييييييييييييييين ... العشرة بالف ... يا مادآآآآام .... البوسي بسبعة لاف .... سلعة البوطيك ....
تلوح عينيك امين و ايسار تلقاش قهوة ... تتمد فيها ربع ساعة و تقوم كيف الفرس المفجوع تجري لا يفوتك الوقت ...
توصل تلهث للخدة سي ديجا تعبت و تعدي النهار بالسيف ...
تطلع تشد البيرو ... قوهتك بردت و مصاطت و حليبها قريب يقراص مطيشة على الطاولة ... الفتفات متع البشكوطو على الكلڢيا و الغبرة بالبالة ...
تكح كحتين بالحساب و تقعد ...
تتمنى كان جيت عطار ولا حماص راك ناصب الكنالو و حاط ديسكو ام كلثوم و ترشرش قدام المحل بدبوزة بلاسطيك غطاها منقوب ... تعنڨر كبوسك و تركح عطرشيتك على وذنك ...
تتفيق من الحلم التافه متاعك تلقى روحك في واقع ما اتفه ...
فيعوض ما تعنڨر الكبوس ... تعنڨر الكاسكة و تستنى اول فرنساوي بش يخرالك في كيفك و ثمانين كيف مبعدو ...
النفس لا ... تكمل مع هذا يهبط عليك لاخر كيف ... راسك يكسروهولك ...
تجي ساعة الفطور ... فيها 10 دقايق عدو ريفي بش تخلط تاكل ... تاكل ما سهل التعالى في 30 دقيقة و يقعدولك 20 دقيقة بين الهضم و الرجوع للخدمة ...
ترجع تركب البردعة فوق ضهرك و انده .... ارررررر ... ارررررر ... انده .... اررررررر ... حآآآآآه ..
و تطلعلك السخانة و تهبط و تربرب و يربربولك و تڨجم و تلغوج و تبلفط و ساعة على ساعة تعفط و يطيحوك و اتطيحهم و تتبهلل و تتبهنس و تتمسكن و تتسكبن و تتلبد و تتجبد وعرفك في لحمك يقدد ...
اررررررر .... اررررررر .... حآآآآآآآآه
يا بهيم بردعتك يا بهيم اررررررر .... ارررررر ... حآآآآاه ....
حآآآآآاه ...
Aucun commentaire:
Enregistrer un commentaire