دليلة طفلة صغيرة لقيتها في محطة برشلونة، عمرها 8 سنين، سمرة قمحية اما الباين اكحل، شعرها ابيض اما مش مالشيب، ابيض مالغبابر ... جاتني قتلي عمي راني جيعانة اشري من عندي كتاب الدعاء هذا حتى بحق خبزة ... ما انجمش نقلكم مصدوم على خاطر ديما نشوفهم يدورو اما ليوم جبدتني دليلة على خاطر حسيتها تعم في حاجة مش من قلبها اما خايفة كان ما تلمش فلوس لا تصيرلها حاجة.
حسيت الي الخوف ماهوش مالجوع، سألتها تقرى ولّا لا قالتلي حاشمة لا ما نقراش اما خويا الي اكبر مني يقرى سنة سادسة ابتدائي ... بهتت ! كي سألتها علاش انت ما يقريوكش قالت انا لازم نبيع بش نلملو فلوس يقرى ...
دليلة عندها 7 خوات 4 ولاد و 3 بنات ... منهم زوز ولاد فالاصلاحية مشدودين على السرقة و البقية يخدموا كيفها يبيعو فالمطويات متع الدعاء !!
كيف سألتها على امها و بوها ... قالت الي امها فالدار ديما مريضة و بوها هو الي يجيبلهم فالمطويات من عند واحد صاحبو شيخ بش يبيعوهم و ياكلو منهم الخبز و فالآخر الفلوس يا تمشي فالشرب ولّا فالقمار !!
دليلة قالت النهار الي ما تروحش بيه للوكالة الي يعيشو فيها بالفلوس بوها يبيتها فالشارع بعد ما يضربها ...
دليلة تخاف مالمبات فالشارع مش على البرد و لا السخانة ... دليلة تخاف مالتحرش الجنسي وقالتلي بالحرف الوحد سعات كي تبدا بين الزناقي متع الحفصية فالليل فما شكون سكران ولّا حاجة يبدا يحب يشدها ...
دليلة ما بدلش الحوايج الي فوقها عندها 8 شهور ...
دليلة تاكل نهار و تقعد 3 بلاش ...
دليلة فما شكون ضربها و فكلها الفلوس الي لمتهم ...
دليلة ما ترقدش الليل ...
دليلة عمرها 8 سنين و سمايل وجها متع وحدة شايلة هموم الدنيا كلها ...
دليلة يتيمة و امها و بوها حيين !!
في تونس ليوم فما برشا من "دليلة" ... و لا من واحد تلفتلهم !!
انهرت الي الطيح دليلة وتولي تخدم في الزناقي.....ينساو حكيتها ويقلك فزدا ..........ف
RépondreSupprimerحال دليلة ذكرني في حال الصغيرات الي يبيعو في الورد في الحبيب بورقٌيبة
RépondreSupprimerla yezi men waldiha thalmouha ikammel il mojtama3....it should be an urgent solution for this innocent girl and those like her
RépondreSupprimer