حرة مرأة تونسية عمرها 40 عام ... مرت دار و عندها 3 صغار !!
حرة خرجها بوها مالقراية مالسادسة ابتدائي قال شنوة حزار و كبرت معادش لازمها تخالط الولاد ...
دونك لازمها تشدّ الدّار، من وقتها حرة في تكوين مغلق على تسيير شؤون المنزل و تستنّى في ولد الحلال ...
حرة كان حلمها تتعلم حتى صنعة تخدم بيها و تخرج تشوف العباد ... حرة مخروما بالديكور اما عمرها ما عملتو علا خاطر بوها و امها "صعاب" و ما يحبوش ...
حرة عرست و عمرها 20 عام كهو على خاطر بوها معادش حاملها و امها خايفة لا تعنسلها ولّاو عطاوه للراجل الي جاي لوّل ...
الراجل الي جاي بش ياخوها بش تقيم بيه و بصغارو نهار آخر ...
الراجل هذا زاد دفنلها حلمتها و كسرلها كلمتها ...
حرة تتمنّى نهار تدو فالشارع و تشري الحاجة الي تشتهاها من غير ما تقعد تحت رحمة سي السيّد الي ديما يقلها لا، تحب تبني الحياة الي تحب عليها، تتمنى تخرج تشرب قهوة مع صاحباتها، تخرج تحوس مع صغيراتها، حلمها تتعلم تسوق، حلمها تشوف برّا من حومتها شفمة ...
تحب تعرف شفمة بخلاف الخضار و الجزار و عطار النهج، تحب تحجّ و قلقت مالمرج ...
حرة الي تعدي وقتها بين ترضي في سي السيد و تربي فالصغيرات تاهت و حارة و ضاعت، كرهت حياتها، و تدعي برحها بش تموت و ترتاح ...
حرة الي صوتها مقموع و ما بيدها حيلة، سلسلوها على بكري ... دفنوها بالحيا !
حرة الي دمعتها مرّة و عيشتها امرّ ...
حرة الي ما قعدت عايشة و صابرة على همّها كان كبدتها هاك التلاثة صغيرات
حرّة عمرها ما كانت حرّة، مذابيها تفرد جنحيها و اطير تهرب ...
حرّة راسها شاب على بكري و هاوني تاكل فالقوت و تستنّى فالموت !!
حرة تلقاها في كل حومة، في كل دار، حرة تنجم تكون امك و خالتك و عمتك ... لكلنا عندنا حرّة ... اما حد ما وصّللها صوتها !!
يرحم والديك ! ماعندك فكرة قداش المرى التونسية الزوالية إلي من عامة الشعب تعاني وتقاسي وتاكل ضرب وفوق هذا ديما تضحك !!
RépondreSupprimer