ليوم بعد جولة مطولة شويا بين حي التضامن و سيدي ثابة و المنيهلة و سبالة بن عمّار و ضواحيها ... ما نجمت نلاحض كان حاجة وحدة برشا خيم بيض على شويا كتيبة مسودة و وجوه مزفطرة و لحي تحك مع القع ...
تسجيلات لمشيخ الهانة رڨود الجبانة متع الجزيرة العربانية ... ضربة يصيح و لخرى يعيط ... و هاو بكى ...
ملخص الحديث هو البندرول الموحدة !!
"ماذا قدمت ليومك الاول فالقبر"
اول مشهد كان في حي التضامن مقابل قهوة : الجماعة مبنكة فالقهوة تتشمد تشرب في قهاويها و الدنيا معجهجة بسواڨرهم، مقابلتهم الخيمة واحد لحيتو تحك مع المادة قاعد على قزدرية مصددة و مكشبر تكشبيرة، هو وقباض الارواح فولة و تقسمة على ثنين ... و الي يتعدة يخلي رقبتو فالخيمة و يروّح
المشهد الثاني فالمنيهلة، بو معاه زوز ولادو ما يفوتوش 7 سنين، لحيتو تكتف بهيم وقف ولادو قدام الخيمة و قعد يحكي مع الزوز الي لاهين بالخيمة و الي يبيعو فالشعوذة الي ملبسينها قناع ديني و خرج مد لكل واحد كتاب متع ما نعرفش شكون اما "سي ديجا" يحكي على عذاب القبر
المشهد الثالث و الاخير في سبالة بن عمار (طريق بنزرت) زوز منقبات و ملتحي ماشين فالكياس و يفرقو في منشورات القصبة 4 و المطالبة بتطبيق الشريعة و منها منها يبيعو في فازات عذاب القبر ... وهوما وجوههم متع عذاب الحياة الدنيا ...
البلايص هذم الي مقطوعين و ما فيهم حتى مصدر تثقيفي لا مكتبة لا دار ثقافة و لا دار شباب لقاوها حل لنشر افكارهم المسمومة بدون اي ترخيص !!
شي يبكي و اكهو !!
في دوار هيشر وحي الوليد، جماعة النهي على المنكر نبهو على طفل يشرب ويبيع في الشراب كان موش باش يبطل باش يحرقولو دارو، وهددّو عليه العشرة متاع الليل، بعد ما سكّر مركز الشرطة. الليوم الجماعة هاذم وقفوهم وعداوهم على حاكم التحقيق في منوبة، عايلاتهم وصحابهم هددوا الكل على المحكمة ... يتبع
RépondreSupprimer