lundi 26 mars 2012

مشروع بناء جامع او بناء مبيت للمشردين ?


كيما قاعدين نشوف الناس الكلّ عدد المشردين قاعد يزيد كل ما تتعدى على اي محطة متع اي وسيلة نقل عمومي تلقى 3 ولّا 4 فارشين كرضونة و راقدين ... من غير ما نحكيو على الحوم الشعبية العباد الي تسكن تحت طرف طولة في الشتاء غارقين و الصيف محروقين ... في وسط البلاد نخرج نعمل دورة في انصاف الليالي نلقى العباد تبربش فالزّبل و ترقد في بيبان البلاصات ... تفرش القع و تتغطى بالسرد !!

و يقابلهم كل ما تطلع زادة فالنقل العمومي و لّا كيف تقعد في قهوة ... يتلمّو عليك جماعة مشروع بناء جامع ... وصدقة جارية و هكا اللّوغة !! و الي قاعدين نشوفو فيه انو معشر المصلين معادش تعجبهم الجوامع ... و تركبلهم باش يصليو في الهواء الطلق ... هوكا منهم لربي !!

ايا قلنا عاد في عوض نبعثو جماعة تحب تبني جوامع ... وهوما عندهم المشيخة عيني ما تضرهم يرفسو بالفلوس و امورهم ستّة زيت ... نوليو نبعثوهم يلمّو هكا الزوز فرنك نبنيو بيهم بيوت يباتو فيها العباد الي مالعرى و البرود و السخانة و الوسخ ... كيف يقوموا الصباح هوما بيدهم ما يعرفوش كيفاش قعدو حيين ...
لا قلنا لا ديار و لا فندق 5 نجوم ... جرد بيت زوز ميترو على تلاثة ... تحميهم مالتقلبات متع الطقس ...
على الاقل يعرف الي هو عندو وين بش يبات !! يعرف الي فما ناس بش تتلهى بيه غادي ... و يعاونوه بش يعاود يندمج فالمجتمع ... كان فما زادة يتعلم صنعة ياكل منها !! و كي السيد هذا يعاود ياقف على ساقيه يخلي البلاصة لغيرو !!

البلايص هذم يعاونو استقرار البلاد اكثر من الدعاء المستجاب في بيوت الصلاة و الّا الجوامع ... على خاطر ربي يعلم ما فالصدور !!

فالآخر هذا راي شخصي ما نلزم بيه حتى حدّ !

2 commentaires:

  1. ti brabi hata houni nhar kemel yebniw fil jwame3 chay ynata9 el jwama3 akther mil 3bed !kol zouz mitrou jama3 wil mdaress fi 7ala wel marchi fi 7ala w el kayasat fi 7ala w ennes 3eddha bich tekel la7jar mil mizirya!

    RépondreSupprimer
    Réponses
    1. انا بيدي هاني نشوف في حومتي (الكبارية) كيف كيف ... مكتبة ما عندناش ... دار الثقافة باش اطيح على ريود الي يخدمو فيها ... هذا كان فما شكون يخدم !! و بعد يجيك يفكلك تيراس متع قهوة و يقلك مشروع بناء جامع !!

      Supprimer