الشرطة في خدمة الشعب من تالي

ايا المرة هاذي بش نحكيلكم على فصيّل صار للعبد لله ولد الكبارية ...

هابط كايتها برجوزي معفن نعمل في قهوة انا و تشكيلة صحابي في ضفاف البحيرة فماش ما ننساو تعب نهار خدمة و نروح على البطالة الي معانا ...

فبيها نوقف الكرهبة ورا كرهبة لوكاسيون فيها زوز فتيات ... وانما بحيث ورايا كرهبا متع اعون الشرّ ... طة !!

ما عجبتهمش كيفاش الفتاة دقت عليا الشباك بش نبعدلها الكرهبة شويا ...

خذاو عليا "طاقت تعرياف" و البرمي و الولاد الي معايا زادة ... و انما بحيث وقت الي رجع البطاقات ما رجعليش البرمي ... قتلو يا استاذ يرحم بوك البرمي .... فكانت الصاعقة وقت الي قلي ما عطيتنيش برميك وليتش انا نلف و نتكتف و في براس لحنينة زيد ثبّت ... يعمل هكّا هزّ روحو و مشا و خلاني انا نكفر و نربرب بش نطيح  لقشة ...

و بما انّو ما فما حد مالولاد الي معايا عندو برمي ... ترصاتلي نسوق بلاش برمي ... و ما وصلت للدار كان بشق الانفس ... بعد ما خدمني عون الامن الشريف فالبرمي ...

بعد بعض من التخمين فهمت الفازا ... انو اعوان الامن قاعدين يخدمو في اقتصاد البلاد بطريقة فعالة ... فانما بحيث كان على كل 5 مواطنين يفكو برمي ... اقتصاد الدولة ينتعش من الخطية مت تعويض رخص السياقة و "طاقات التعرياف" و الوراق جملة بالحملة ... 

وكيما يقول المثل الطجكستاني " البير بير و الماجل ماجل والبوليس عمره ما يولي راجل" ...

فايسبوك و التصدي للاشاعات

في تونس لازمهم يعملو كيما عملو في الشنوا مع الريزو سوسيال متاعهم "Sina Weibo" و عملو "Permis à Points" بش ينقصو من انتشار الاشاعات و التحريض على العنف ... "Sina Weibo" الي يشبه برشا للـ"Twitter" في استعملاتو كثرو فيه الاشعات و الي هيا ممنوع تداولها حسب القانون الصيني، ولّاو عطاو 80 نقطة لكل حساب على الموقع الاجتماعي هذا ينقصو آليا كيف واحد ينشر اشاعة او خبر خال من المصداقية !!

الشي هذا لازمو يتعمل في تونس على الشي الي يعمل العار الي قاعدين نشوفو فيه في الـ"Facebook" خاصة الصفحات الكل تفلم و تجيب من عندها في سيناريوات حتى هيتشكوك ما خممش فيها ... و اي واحد ينشر خبر ينقصولو النقاط متع ال"Permis" متاعو و كيف يوفاو الـ"Points" متاعو يتسكر "le Compte" ... وهكا نرتاحو من هكا المفرخة متع حك راسك خرج اشاعة بش يدبر شويا "J'aime" على شويا "Commentaires" ...

وهذا زادة ينطبق على الصحف او اشباه الصحف الالكترونية الي تحط فالاخبار بوه على خوه و مصدر المعلومة متاعو فرخ ڨامط فالـ"Facebook" حاط خبر لا ساس لا راس !!