وانا صغير كنت ما نحبش نوم القوايل، كنت نشيخ كيف نبدى نبربش في كتاب و الّا في جريدة، نشد لعبة و تورنوفيس نبدى نفرّك و نركّب ...
كنت نشيخ كيف نطلّ من الشباك فالقوايل تجهرني الشمس في عنيا ...
كنت نشيخ كي نجري وحدي كيف المهبول فالفيراندا متع الدار ورا كورة ...
كنت نشيخ كيف تبدى امي تعيط من بعيد ايجا هنا ...
ادخل سخانة عليك ...
ادخل يا عيش ولدي ...
لين نوصولو ادخل لا نعيطلك لبوك ...
و تجيك شلاكة طايرة من بعيد ...
كنت جنّ قايلة على اصولو ... كيف امي تعاقبني و تحطني فالسو سول ... نقصّ عليهم الماء
ومبعد نشد كتاب و نعيش انا وياه سعات حميمية ... ناكلو بعينيا ...
لين توفى العقوبة ...
نخرج تبوسني امي و تقلي في مصلحتك عيش ولدي ...
وهي ما فيبالهاش الي مصلحتي في هاكا الكتاب الي عشت انا وياه سوايع ...
كنت نهيج ونكلب بش نتشد في هاكا السو سول ...
كلنا كنا جنون قايلة ... اما جنوني في صغري نفعني في كبري !!
Aucun commentaire:
Enregistrer un commentaire