السبعة و نصّ ينوقز التاليفون باش نفيق نمشي نخدم، نحضّر روحي في نصّ ساعة، نفطر في درج ...
الثمنية و درج نخرج نهرول مالدار تقول نترانا عدو ريفي بش ما يفوتنيش الميترو متع الثمنية و درجين ...
عينيا مزالت مخبلة بالنوم، نطلع في مترو كلوّ وجوه مكشبرة، كان تحرك فيهم واحد راهو باش يتثاوب ...
وجوه حفرها التعب و الزمان علّم عليها ...
رجال كبار حياتهم تعدات بين المرمات و نساوين بين الديار و الادارات ...
نوصل لمحطة برشلونة الثمنية و نصّ تسطعني الشمس في عينيا و حسّ النصّابة الي بدات تعيّط كسرلي وذنيا ...
نخرج مالمحطة، نشوف فالعباد افواج خارجة مالڨار و من محطة الكيران ...
نقصّ الكياس و السكّة نلقى روحي مقابل سفارة ايطاليا، ما تسمع كان ب 100 و العشرة بـ 1000 ...
و الموضة الجديدة متع نصب البورتابلوات الشنوة الي تلقاه حاط فيه مورسو مزود مخلط بالرّاي يدرّع الخواطر ...
نوصل لوين نخدم فوق مونوبري جمال عبد الناصر، قبل ما نطلع نتعدى للقهوة نهزّ قهوتي في ڨوبلي ...
نسلم على كحلة القهواجي و نسألو على احوالو و احوال الصغيرات، ديما حامد ربي و يقلي مدام نخدم مدام لباس ...
نتعدى نخلصّ قهوتي فالكاسة و نطلع نجري !!
نتعدى للسال دو بوز نلقى الولاد مزالو كيف خلطو حتى هوما مدهشرين بالنوم ... يخممو في ال"pique d'appels" الي باش يكرّوه !!
نعملو ضحكة صباحية خفافي و كل واحد يشد الماكينا متاعو و بحذاه دبيبيزة ماء !!
و تسمع "enchaînement" متع "NRJ Mobile" فولان "à votre service Bonjour" !!
والي زراڨ مالعصب و الي يستنى في دورو بش ياخذ الـ"Pause" متاعو !
و الي يحرر فالوقت بش ياخذ الـ"Pause Déj" !!
و يرجع لعشيا دايخ بالماكلة ومذا بيه يرقد و هو مجبور يسمع تخرنين الفرنسيس !!
و يستنى بالدقيقة و الدرج وقتاش يوصل لفرشو بش يرقد وناسي الي الـ"Boucle" هذا بش يتعاود برشا و كلّ يوم !!
هذا الي نعيش فيه كلّ يوم ومزلت بش نعيشو برشا ... مجبور كيفي كيف صحابي بش ما نقعدوش بطّالة ... مجبور نقتل حياتي الاجتماعية بش ما نقعدش محتاج و في هالعمر نمد يدّي لبويا للمصروف !!
Smooouuuu777! Extra! Bravo, c'est excellent ce que tu fais! 7assane wassél!
RépondreSupprimer