ايا على سلامتكم ...
انا كمواطن تونسي عاسي جدا، نطلع يوميا في وسائل النقل العمومي و بالاخص المترو، الي يلم الشعب لكل، و نمشي على الــ 11 في جميع ارجاء الوطن الكبير، يا سيدك بن سيدك امنية حياتي نلقى واحد يتبسّم في وجه خوه !!
المقام الاول : المترو الخفيف
يا ديني ما تلقى كان الي يحكي فالتليفون و يعيط تقول بين زوز اجبال، و الي ينفخ و يأفف و الي يستغفر و الي يطلب و الي ينطر و الي تبكي و الي دايخ و دايخة و الي تركبلو يقوم يصيح و الي المترو يبدا يجري و هو يجبد فران تلقهى الناس ملوحة فوق بعضها و الشفور يعيط ابعد عالباب خلي يتسكر يهديك، و كان ما سمعو حد يمشي بالباب محلول، و الي يطلع ينتج و يفك و الي يستناك فالمحطة بش يسترزق منّك، وخلي عاد من هاكا جماعة الكريم متع الله كل واحد عندو ديسكور محضرو مليح بش يستعطف شويا عباد و ينطر خبيزتو الباردة !
المقام الثاني : شارع الحبيب بورڨيبة
اكثر شارع رمادي شفتو في حياتي، في عباد ملونين اما مش في حوايهم، اما في طبايعهم و في خلاقهم، و انا عنيا ماشيا امين ايسار كيف الكورة بين الذكورة و البناويت، الي ماشي و شاد تاليفون و شفور تكسي يزمر عليه بش يبعد، و الي طالع بكرهبتو فالمادة و الي يدز في البيدق في الكياس، و الي طيش بونتا متع سيڨارو و الي يعيط لصاحبو من بعيد، و كان فما شويا نصابة تسمع العشرة بلف، و هبلي راجلك بدينار يا مدام و هات من هكا القلة ... والكيران الصفر الي معبين بالڨرودة شادين مادّة الوسط و يستقاتو من بعض الشباب الي هابط يبزنس فالآفيني !!
المقام الثالث : باب بحر
المدخل الرئيسي للاسواق وين يهبطو التوريست يتفرجو في عجب ربي، التبزنيس و التسمسير و التقطير و التكحيل و كان فما نطرة، و تفضل مدام و تفضل موسيو ، و "c'est moins cher que gratuit" و "bonjour la gazelle" ... اما تبركله عليهم مولتيلونڨ ... و فما الي يطش طشان ، و المواطن التونسي تلقاه مزروب بش يتعدى يعثر في توريست، و الي يكركر في برويطة و يعيط برّا ساڨيك لين تخلط للشواشين بش تتفرهد شويا و تقعد تعل كويس تاي منعنع و تقوم تكمل ثنيتك !
و في وسط هالمقامات الثلاثة مزلت نلوج على تبسيمة في وجه مواطن، و الي تلقاه يتبسم للريح ما تنجم تقول عليه كان "البوهالي السعيد" !
اما مانيش مأيس الي بش نشدو يتبسم للعباد لولاني بش نعمل انا وياه تصويرة ...
ابارمن ما netla9awech أنا وياك, خاطر أنا ديمة نتبسم لل عباد و نصبح و نقول عسلامة, وال ناس ديمة يا تغحرلي يا نسمع كلمة زايدة.. أنا قتلك صباح الخير مش اجا أرقد معايا..en tout cas ken تلقينا نهار نعملوا تصوير
RépondreSupprimerTout ce que tu décris est vrai, mais ca fait partie du folklore local du centre ville et des rues adjacentes ...
RépondreSupprimerEt j'aime mieux ca que le snobisme sans ame des nouveaux quartiers de Tunis