mercredi 7 mars 2012

العَلَم و دَنّسُوه

تصرفات السلفيين ماهيش متع عباد ادافع على حريتها الشخصية او حرية بعض الطالبات في ارتداء النقاب و الّا ردّة فعل على القرارات الادارية و العوقبات الي حكمو بيها عليهم ...
هذم ناس يحبو يلقاو لرواحهم ارضيّة ... يستقرّو فيها و يتكّاو عليها و يبداو خدمتهم ...
و منها يبداو ينشرو افكارهم المسمومة ...
بالطبيعة بعد الحكومة مسيبتهم على طلق ذراعهم ...
شي في منوبة و شي فالاذاعة و التلفزة و شي كل نهار جمعة عملين وقفة احتجاجية في بلاصة ...
المشكل مش هوني ...
المشكل انو العباد هذي قاعدة كل يوم تزيد تشوه في البلاد ...
كل يوم يزيدو يخلقولنا مشاكل ...
و آخرها ليوم يهبطو اكبر روموز البلاد "العلم" و يستبدلوه بعلمهم السلفي الملود الملوّط ...
وينو دور الامن في حماية ممتلكات عومومية ...
وينو الجيش متع "صور للوطن" و "الذود عنه" ...
و الا ماكم لاهين كان تحبسو فالصحافيين ...
هاو على خاطر حط تصويرة شطر بزولة عريانة ...
و الّا لاهين بحملة تحزيب الاعلام و ترجعوه للعهد النوفمبري ... بالتعتيم و التبندير  ... 
اليوم كرامة الوطن في الساقين ... ليوم اهانو شعب كامل ... ليوم دم الشهداء الي مزال ما شاحش نجسوه 
وكيما العادة تو يشدّوه و النيابة العامة تعمل معاه جوّ ... و مبعد جمعة يخرجولنا يقولولنا "سامحونا طلع خاطيه" ...
الحكومة هذي في عوض تتلهى تشد في هالجرذان الي البلاد هزوها للهاوية و مزاولو هزينا ...
لاهيا تحط فالشباب فالحبوسات على جونتة و الا على كلمة حرّة ...

حكومة العار و الخنّار !

Aucun commentaire:

Enregistrer un commentaire