jeudi 8 mars 2012

نظرية المؤامرة ... او نظرية دزان العصى فالعجلة


الحكومة الجديدة الي تتشدق علينا بالقطع مع النظام البائد ... ماهي الّا تواصل لها ...
اما المرّة هذي بقناع شرعية الصندوق ...
و اتعس ...
ما تبدل شي على عهد الزعبع ...
المجموعات الملثمة ولّات ايادي خفية معرقلة لعمل الحكومة ...
اي صحيح عرقلة عمل الحكومة على ارساء دكتاتورية جديدة باسم "لا الاه الا الله" ...
دكتاتورية جديدة بلغة الاغلبية النظيفة و الاقلية الساقطة ...
محاولة حزب الدولة كيما كان "التجوع" الدستوري قبل ...
ميليشيات التجمع ولّات مجموعات سلفية تنشر الرعب و ايهام الشعب ان الحكومة تريد التصدي لجميع اشكال العنف على المواطن ...
سياسة الحياز على وثائق و قوائم اسمية بمعرقلي عمل الحكومة و بالطبيعة لكلهم من احزاب المعارضة او ما يسمونه باليسار المنهزم و جماعة الصفر فاصل ...
الشعب يا حكومة العار مذابيه يشوف هالقوائم الاسمية ... بش كان فمّا شكون متآمر على مصلحة الدولة نحاسبوه ليوم قبل غدوة ...
و يظهرلي ما فماش متآمر على مصلحة الدولة قد هالمجموعات السلفية المخربة الي وصلت باهم الدنائة انهم يدنسو العلم المفدّى رمز مقاومة الاستعمار الفرنسي و الطاغوت زين العابدين بن علي ... العلم الي بكينا عليه دمّ في بلاصة الدموع ...
يظهرلي ما فماش متآمر على مصلحة الدولة قد الي يحجب الحقيقة على الشعب بتعلة انّو ماهوش الوقت المناسب لنشر المعلومات ...
يظهرلي ما فماش ما اتعس انك تشري ذمة العباد للوصول للسلطة ...
يظهرلي ما فماش ما اتعس انك باسم الدين تحط يدك في يد العدو الازلي للوطن العربي ...
يظهرلي ما فماش خيانة اكبر من خيانة القضية الاولى ... القضية الفلسطينية ...
يظهرلي ما فماش ما اتعس من تخوين ابناء الوطن و تقسيمهم ...
هذا ما كان يستعملو النظام البائد لتقزيم و قمع المعارضين ...
على خاطر ما فماش حجج و ادّلة على انهم يحطوا فالعصى فالعجلة ...
السياسة الي ضحك علينا بيها الزعبع 23 سنة معادش تتعدّى ...
يا تكشفولنا عن هوية المتآمرين ... 
يا توليو انتوما المتآمرين على ابناء الوطن ...

ومن الآخر .... "فلا عاش في تونس من خانها" !!

Aucun commentaire:

Enregistrer un commentaire