شويا مالحنة ... وشويا من رطابة الايدين
في ذكرى اول شهيد فعلي فالعالم الافتراضي زهير اليحياوي ...
استدعى الرئيس التونسي المنصف المرزوقي مجموعة من المدونين و ممثلين عن صفحات الفايسبوك البودورو و الي جايبينها مناظلين ...
الموضوع كان حرية التدوين و الانترنات بصفة عامة ...
و تكريم لزهير "التونسي" المقاوم للنظام البائد الى ان وافته المنية 13 مارس 2005 ...
تقوم احد المدونات بطرح موضوع حرية المرأة و التدوين ...
اما زلعتها كيف بدات تجبد على النصوص الدينية و احتكارها من العنصر الذكري ...
و هكا عطات حجة للثوارجية بو دورو بش يكنطروها و يعملو الي يحبو عليه فالقصر ...
و عياط و صياح و تهريج ...
و ما نقصها كان تنتيف شعر ...
عام و شهرين بعد الثورة مزال فما شكون يعارك و يبلبزها بش ينسب الثورة ليه ...
ايا سيدي لا المدونين لا صفحات الفايسبوك هوما الي عملو الثورة ...
التونسي الجيعان و المضتهد ... التونسي الي مات خوه و صاحبو و ولد حومتو ...
و ما فما حدّ في تونس تونس عندو الحق ينسب الثورة لروحو ...
انا نلوم على المدونين الي قاعدين يعطيو فالسلاح للفايسبوكيون بو دورو بش يدورو عليهم و يحاربوهم بكلامهم ...
نلوم عليهم الي في منتدى تكريمي لشهيد الانترنات "التونسي" زهير اليحياوي كل واحد يحب يجبها بطل و يحكيو على امجادهم و نظالاتهم في العالم الافتراضي ...
ومالآخر لك الله يا تونس !
الاثنين يشكرو ربي جلنار والجماعة الي قامولها كل واحد يضرب على درابوه ويحب يفرض رايه والاثنين مسو تسمع حسو ! بالنسبة لي الصراخ ورفع الصوت والأيدي وما إلى ذلك من شتم وسب واتهام وتبريب مهما كان مصدره دليل على ضعف الموقف والشخصية! كل واحد فيهم يصور في روحو بطل والبطل عندي المواطن والمواطنة الي قاعد يقرا على روحو ولا يخدم على روحو ولا يربي في صغيراتو ومتحمل هالقساوات ومخلي الحياة تكمل ثنيتها رغم كل السياسيي والمدونين والإعلاميين ورجال الدين الذين يحملون شعار THE Show must go on!
RépondreSupprimer