معتمدية الكبارية ... 180 الف مواطن ... من زرڨ عيون ... البطوار ... الورديات ... حي النور ... الاكراد ... الوكايل ... بو حجر البلدية ... ابن سينا ... واد الدّم... واد السّلة ...
هنا الفقر عمرو ما كان شبح ... هنا الفقر شيطان ساكن مخاخ العباد ...
هنا نتمردو على الفقر ... بالزطلة ... بالشراب و بالبنتاكول ...
هنا ملي عمرك 5 سنين تعرف لحام الزطلة ... عادي جدا خاطر في كل راس نهج تلقى لحام ...
ملي عمرك 5 سنين تعرف الي يبيعو الشراب و الدواء ...
ملي عمرك 5 سنين تعرف فصايل حومتك بالاسم و واحد واحد ...
تتربى على صوت ولاد حومتك فالقهوة ... على حكايتهم مع الحاكم ...
على البطالة ...
على الغورة ... على المشاكل مع ديارهم ...
على واحد جبد البوسعادة ... على بوه بش يدبر حق شيختو !!
هنا الفقر عمرو ما كان شبح ... هنا الفقر يوجع ...
هنا الفقر يتداوا بالسرقة و النطرة ...
هنا الفقر يعدي ...
هنا بعيد على العاصمة 4 دراج بالمترو ... مزالو ديار بالطولة ... مزالو يستعملو البهايم ...
هنا مزال فما شكون يسكن فالغابة ... في خيم ...
هنا مزلنا نلمو فالخبز البايت ... هنا مزلنا بكريطة و بغل و يعيط "فحام"
هنا مزلنا نلبسو روبا فيكيا "Roba Veccia"
هنا مزلنا على النفس نتحاسبو ...
هنا مزالو يسترخصو فينا ... و يشريو ذممنا بـ 30 دينار ...
هنا من 10 فالشهر ... عايلة كاملة تموت بالشرّ
هنا الفقر ماهوش شبح ...
Aucun commentaire:
Enregistrer un commentaire