الڨعدة كوديا و الكمية حديث

هنا نڨلبو الكوديا كريلو ...

هنا ولد الحومة يڨريلو ...

هنا صباتي نبيعو على شيخة راسي ...

كميتنا حديث ...

ڨلب الحديث ربطيات ...

فولان يعدي في عامو ... مش عام جيش ... اما طاح عالزطلة ...

فولان زادوه في حكمو ...

فولان ضرب فلتان في وجهو ...

فولانة تمشي فالسيڨريتو مع فولان ...

اينڨزو مالربطيات ... للكورة و روايتها ... و دربي 96

و دميعتين على المرحوم بلها ...

و زهاتلنا بالكوب دافريك 2004

والي مش مغرومين بالكورة ...

يحكيو عالمزود ...

و الحرقة للطليان ...

هنا السيڨارو يتبشطر ...

كان ما دارتش جونتة  ...

هنا البكمة يتكلّم ...

هنا تتصنّت و تتعلم ...

هنا ما عندك علاش باش تفلّم ...

يطيح اللّيل و الرجال مازالت ڨاعدة ...

فولان سكر ... اڨلبلو كاسو ...

سعات تتحير المواجع ...

و سعات تصير فجايع ...

و سويعة ضريبة ثقافة ...

و سويعة حلمة البرومسبور ...

سعات توفى السهرية بالحسنى ...

و سعات توفى فالمركز ...

و سعات توفى بضحكات ...

وساعات توفى بمنواحة ...

هنا الڨعدة كوديا ... وكميتنا حديث

Views