ايا
يا جماعة على تصاور البارح متع الكبارية ... صارو في بو حجر بعيدة 500م
على البلاصة الي نسكن فيها ... الي زعمة زعمة جايبينها سلف صالح هوما
الفصايل و الزبراطة الي جايبينها تابو لربي و هوما بعد ما يخرجو مالجامع
يدورو جونتة ... دائرة الكبارية فيها 180 الف مواطن يعني هاكا البطحة الي
مقابلة الجامع الي تلمو فيه ما تلم كان 1000 مواطن على اقصى تقدير و
الجامع من داخل صغير يلم 500 واحد بالمشطة ؛)
جايين يصورو في
السلفيين و وجدي غونيم فالكبارية ... المعتمدية الي ما تبعدش حتّى 5 كم
على العاصمة ... المعتمدية الي كلاها الفقر الي الدار المزمرة تلقى فيها 7
صغار و البو ينطر فالفرنك بالسيف ... الي طفل اول ما يكبر يتعلم النطرة و
السرقة و المكتب ما يعرفو كان بالاسم ... و ما يطلع كان زبراط و مالشراب
ما يقومش ...شافهمش هاذم ... الي فما ديار مزالو بالقصدير و الشعر ما
عندهمش حتى باب على الريح و البرد ...
و زيد يبهتني فالتصاور الي
حطوهم تصويرة سيد متخلف ذهني ... و فاقد مداركو العقلية ... و الكسكروت الي
شراوه بيه مزال في يدو ... في وسط الجامع ...
معتمدية فقيرة و محرومة رغم قربها للعاصمة ... يستغل في فقر و في ضعف حال المتساكنين ...
كيما كان يعمل بن علي قبل ... يبعث شكون للمنطقة بش ب 10 دينارات و كسكروت و باكو دخان يمشي يصفقلو عام كامل فالشموسات و فالبرود ...
نحكي بغلبة على حومتي الي صحيح فيها برشا فقر ... اما خرجت رجال .. خرجت الاساتذة و المحامين و الطبة و مربي الاجيال ...
نحكي بغصتي على حومتي الي يحبو يركبو عليها جرذان الضلامية كيما ركبو عليها طحانة حزب الغراب الازرق و التجمع قبلهم !!!!
Aucun commentaire:
Enregistrer un commentaire