الثقافة للكرز فقط

في حفل اختتام ايام "سينما السلام ؟" استوقفتني مداخلة متع انسان حب يجي يتفرج اما استغلى التسكرة وقال بالحرف الواحد "الزوالي ماعندوش الحق، الثقافة للكرز كهو" ...

خلاني من وقتها نخمم بيني و بين روحي و نتفكر الحاجات الي حظرتهم لكل و اسوام التساكر من وقت الي بديت نتبع في العروض الثقافية في تونس او الشبه ثقافية نظرا للمحتوى الحموم الرزوم (تو نحكيو فيه الموضوع لاحقا) ...

العروض الي يقول القايل تستحق تلقاها ما اقلش من 20 دينار كان في المسرح البلدي يحطوك منك للسقف وكان في قرطاج تلقى روحك في Zone C    لازمك  Jumelle   باش تتفرج وكان خلطت على شويا صوت بوك بي ...

مبعد جيت نشوف في الناس الي قاعدة تحاول تنشر في الثقافة البديلة زعمة زعمة ما يبعدوش ياسر و الاسوام تبدى من 12 دينار 

وكان لقيت حويجه متع 5 لاف فرنك اعرف الي 90 دقيقة لعب باش يقلولك ما فما شي و روح وفلوسك سي ديجا انساهم ...

ساعة على ساعة نبدى في صف مالصفوف نستنى باش نقص التساكر (من ارخص ما فما كان لزم بلاصة في ميحاض) نسمع العباد الي تجي تسال عالاسوام متع التساكر تتفجع ...

نتفكر مرة نقص لمهرجان قرطاج جا واحد يسال وقتها التساكر بين 35 و 60 دينار (بخلاف رحلة الشتاء و الصيف) جاء واحد يسال كيف جاوبتو قلي علاش باش نروح بيه معايا الي يغني ولا باش نروح بطرف اثار مالمسرح الروماني انا ؟

وخلينا من الكتب عاد، كان مش واحد برابشي و سنس روحو بالكتب القدم لا ترصيلو راهن روحو في بعض البلايص ولا بايع كلوة ...

ما تسمع كان 30 و 35 و ندرا قداش وخلي عاد كان كتاب تونسي عليه القيمة (مش الكتب بودورو) لازمك تخمم 60 مرة تاخدو ولا لا ...

وقلك باش يشعونا نقراو الكتب التوانسة باش يعملو تسعيرة، تي بالحرام لتو لا ريتها ...

تي سعات الواحد يخرج بغصتو من مكتبة من المكاتب خاتر الكتاب يحب يقراه على وراق ويعرف روحو باش يكرز و يكره روحو كان باش يقراه عالحاسوب (هذا كان لقاه) ...

تي المفيد الزوالي حتى في الثقافة المزعومة مش لاقي بايو و بشوية بشوية لين حد معاد يخلط يحط ساقو في اي حكاية ثقافية تتعمل و خاصة الي معندهاش علاقة بوزارة اللاثقافة ...

وانا كمواطن يطالب بحقه في الثقافة نحب كل شي يطيح و يتعاود يتبنى من جديد ..

والعقل ولي التوفيق !

انفجار ثقافة الكتاب في تونس

ظاهرة اهتمام اغلب شباب تونس بالكتاب و الكتابة مهيش ظاهرة جديدة لكن العدد متع الشباب الي رجع يعود في روحو على قراية الكتب قاعد و يتزايد بشكل كبير وهوني بالطبيعة ما يهمش نوع الكتب الي يقراوها اما الاكيد انها كتب خارجة عن ميدانهم الدراسي

في السنوات الآخيرة التونسي ولا يعطي اهتمام اكثر للكتب شنو خلانا نشوفو النقد اللآذع لمعرض الكتاب السنوي و نقد نوعية الكتب الي يجيبو فيها و خاصة انو التونسي تعود على نوعية من الكتب يلقى روحو بين كومة متع اوراق مسمومة لا تمثل افكارو

كيف كيف ولينا نشوفو الندوات و الحوارات حول الكتب و كتاب تونسيين مغمورين يتشجعو و ينشرو الكتب متاعهم 

والكتابة على المواقع الالكترونية دون حرج و المدونات الشعرية و النثرية الي تكاثرت و لقاو برشا منهم نجاح برغم الاخطاء اللغوية 

في هذا المقال الاول باش نحاولو نشوفو اهمية الكتاب عند البعض قبل ما نحكيو في مقال آخر على ظاهرة التدوين الادبي

حاولت نشوف معنى الكتاب عند بعض الشباب الي تقرى و الي ما تقراش الكتب باش نشوفو معنى هذا الانفجار المفاجئ لثقافة الكتاب

السؤالات الثلاثة كانو اهمية الكتاب بالنسبة للشخص و كيفاش يشوفوك العباد و انت تقرى و شنوا اهمية الكتاب في تطوير المجتمعات

باش ننقل شنوا قالوه بالحرف و باللوغة الي جاوبو بيها حتى لوكان بالدارجة المكتوبة بالحروف اللاتينية :

_____________

**

سمر بالحاج

l kteb houa kol chay nhessou a9reb haja leya w yefhemni .. Aslan yhezni l 3alem ekher 

hhh 3omri ma nhar jbedet kteb w ma nabbarech alia had surtout ena na9ra bel 3arabeya .. Fi hak intello w ena ma fibelich fi chbik jeyba dictionnaire .. Fi ekher marra 9rit bel 3arbi Ken kteb rami w Salma hacilou ....

b tbi3a l kteb ysehem barcha f tatawer l mojtama3 yhelek mokhek w yaatik tassawer ekher .. Aslan chwaya tha9afa

بلقيس موڨو (طالبة سنة ثانية ادب انجليزي)

الكتاب كيف السينما والموزيكا، متنفس..نهربولو من الواقع البائس؛ نلقاو فيه شخصيات تشبهلنا ولا تمنينا كان قابلناهم ..نكتشفو فيه حقيقة دواخلنا وزيف قناعاتنا. كي نجبد كتاب قدام صحابي يقولو "هاي الناس المثقفة" ويحزدوني على طرف الوقت إلي عندي. الأدب قادر إنو "يقرقش" المجتمعات ويصلحها ..لازم قراءة موجهة بش تحصل الفايدة.

هيثم بوشامعي (طالب)

benesba leya ena lekteb yrata7ni barcha wkif na9ra kteb netfarhed yeser w nasra7 m3ah w n3ich fih mahma ken nawe3 lekteb ...s7abi yath7ko barcha 3lia kif yrawni na9ra fi kteb w presque lkolhom sauf zoz menes kifi ya9raw donc walit m3adech nched kteb kif nbda m3ahom.....nchouf eli ken jet enes el kol ta9ra rahi merte7a moralment w mahomech stresee kima haka w najmo bel 9raya n3awno fi barcha 7ajet

امال غربي (تلميذة)

Le livre est un moyen pour s’évader du monde à mon avis ! Un moyen de voyager à l’extérieur sans même bouger , un voyage spirituel et fantastique . Le livre est mon ami , le jour ou je ne trouve personne à mes côtes , j'ouvre mon sac à dos pour trouver un livre prêt à être mon compagnon . Euh , mon entourage est tolérant en quelques sorts avec les book-lovers . En fait , rarement qu'un personne me demande c'est quoi ça ou c'est une perte du temps . Seuls les imbéciles heureux ont tendance à me critiquer .

Selon le choix de lecture qu'on pourrait à voir du progrès . Mais généralement , les œuvres aident à avoir une autre conception de la vie .

بالطبيعة باش نخليلكم حرية التعليق على الاجابات الي تحصلت عليها من عند الاشخاص اعلاه ...
الي صعيب انك تفهم هالظاهرة بدون معرفت شنوا الي دفع الناس هذوما باش يقراو كتب

في المقال الجاي باش نحاول نعرف شنوا الدوافع الي تخليك تقرى و شنوا تاثير المحيط الي انت فيه او انها موجة تقليد عمياء ...