على سلامتكم ...
ليوم وكيما كل يوم قاعد نلاحض الي التونسي اكثر انسان يمارس الرياضة بجميع اختصاصتها في العالم و زيد فوقهم اختصاصات ما تلقاهم كان في تونس ... اخطونا من ريق شركات الاحصاء و هاكا الدولاب ... كيما يقولو ناس قبل عينك ميزانك !!
قداش من تونسي يمارس في رياضة الركض وراء الترونسبور ؟!
برشا ... و الاقوى الي التونسي و الاّ التونسية ما يسحقش معدات و لبسة خاصة بالاختصاص عادي تلقى وحدة امكيجة 6/12 ولابسة طالون و تجري في جري مهول بش تخلط على الكار ...
و مع ضهور النصب و الاكشاك في البلايص الكل التونسي يمارس في العدو 1000 متر حواجز و تڨزيڨ و بالطبيعة فالشتاء تزيد الصعوبية على خاطر مع النصب تزيد الڨلت و الطباعي ...
و ساعة على ساعة تتعدى في نهج تلقى زوز يمارسو في رياضة المصارعة مع العلم انو المصارعة في تونس مالحزام و انت هابط في الضرب و تنجم تبك المنافس من الحزام و انت هابط بالكلام ...
و عندك رياضة تلقاها عند المفرخ الضغار و هي رياضة "الڨمارة" ... تلقى زوز فروخ بيناتهم 100 ميترو اقل شي و الحجر يطّاير و الي يتدمغ لول يخسر ... الرياضة هاذي عامة ما يتدمغ فيها المتفرج قبل ...
فما اختصاص دلول اما ما تلقاه كان عند البنات ... رياضة جبدان الشعر و الرياضة هاذي الهدف منها تلقى كبة شعر بين ايديك بعد ما توفى المنازلة ...
و خلينا من لعبة الكراسي الموسيقية الي بلاش موسيقى ... و كل شي مسموح فاللعبة هاذي المفيد فك كرسيك ... بدات بالكيران و المتروات و وصلت للوزارات و المناصب ...
وخلي مالقفز الطويل و القفز مالفجعة و الجابر القافز و الي يحب يقفز ...
ورفع الاثقال الروح، ورفع اثقال الضلّ ...
وع هذا الكل تلقى التونسي ينجم يمارس هالاختصاصات الكلّ في نهار واحد ...
و الله المستعان ها شعب !!
بالسّلامة ...
