تصريحات نارية لحسين الديماسي

حسين الديماسي وزير المالية المستقيل و جامعي تونسي، كان ضيفا امس في قناة حنبعل و قد اطلق تصريحات نارية فيها انتقاد حاد لحكومة الترويكا و كان قد اشار ايضا للتغول المالي الذي تقوم به حركة النهضة.

حسين الديماسي اكد ان قانون المالية لسنة 2013 يدفع بتونس نحو هاوية وكان ذلك بحضور كاتب الدولة سليم بسباس ولم يتردد وزير المالية السابق في اطلاق هذه التصريحات مضيفا ان قانون المالية ليس فقط خطيرا بل كارثيا و انتحاريا و سيؤدي بتونس الى الافلاس و ان تونس مع "الخوانجية" و محاولة تغولهم لن تكون بخير

بعد خمسة شهور ؟

بعد خمسة شهور و الحال من التعيس لأتعس، الزوالي مزال عايش لتالي و عمال و يوخر كيف بول الجمل، وعدونا و عدوكم، زكمونا زكموكم، هبلونا و هبلوكم و مزال الخير لقدّام

بعد خمسة شهور الرئيس مزال طرطور، جماعة التأسيسي عملو كروش و حناك من فلوس الشعب، ماكلين راڨدين و ماهمش معبرين، بن جعفر حل فينا جعفرية و محرزية كيف رڨاص المنڨالة مادة وجها في كل بلاصة

بعد خمسة شهور حكومة الوعود، حتى بيان شجب و تنديد ما كتبتوش، الشعب سوّس مالشرّ و هوما خمرو بالنّوم

بعد خمسة شهور اهمّ انجازات الحكومة على الصعيد الخارجي، بردلوها مع روسيا و الشنوة، بردلوها مع سوريا و الدزاير، تبادل خبرات مع اثيوبيا (باز مانا قادمين على مجاعة)، دعم ثورة شمال مالي، تنهنتيلة من عند حمد و آل سعود، و تونس ولّات تحط في صفحة النكت متع جريدة الشرق الاوسط

اما فالانجازات الداخلية سانك آ جودي عليهم، ثلج سكر الدنيا و طيح القناطر و فيض البراجات، فيضنات مهولة رحلت بشطر بوسالم و مجاز الباب، و اعصار كسّر الدنيا، و زيدهم التونسي ولّا بالقدر هو و الخضرة يسلمو على بعضهم من بعيد، خلي عاد ماللحومات و الحوت، ولّاو علامة من علامات البرجوازية المفرطة ... زيد على هذا معمل تسكّر و البطّالة تزيد ... والشباب يغني للطليان "كل يوم حبك يزيد" ...

و في التشغيل ولّاو يطلبو عليك 5 سنين خبرة في "حبّ المغامرة"، بيان سور على خاطر باش يغامرولك بحياتك و يبعثوك تخدم في ليبيا

في ظل هذه الحكومة الرشيدة كان تقول شي ما تبدّل ما عليك كان تشرب من ماء البحر !

سمير ديلو و مراجعة القائمة متع شهداء الثورة

ايا سيدي ڨلنا السلام ...

كيف العادة خرجلنا سمير ديلو من حيث لا تعلمون بحكاية حائطية ... بش يلهي بيها الرئي العام على الخور و العوج متع الحكومة 

 المرّه هاذي هي مراجعة القايمة الاسمية لما يسمى بشهداء الثورة ... القايمة هذي الي سبقو و حددوها وحدهم من غير ما دزهم حدّ

قال شنوا مش الكل شهداء و ما لازمهمش يدخلو يحت غطاء التعويض المالي ما يجيش ... وبش يكبدونا خسائر مادية و برشا فازات

انا بش نقلّو اوّل مرّة نشوف وزير حقوق انسان حيوان متكلم و ماهوش من جنس البشر جملة وحدة ...

انسان خارج بش ويعمل آش بش يعمل حتى حد ما يعرف على نيتو وقتها ... جاتو كرطوشة مقصودة و الّا خاطية ... ومات !!

عايلتو و صحابو و ولاد حومتو ترزاو فيه ... زعمة كلمة شهيد و الّا الله يرحموا بش تعوضهولهم و  تصرف عليهم كيما كان هوّا قايم بيهم ... 

شكادك يا سمير يا راس البهيم كان بش تمد للعايلة 30 الف دينار على الاقل يعملو بيهم حاجة تخرجهم مالفقر الي هوما فيه ...

كانك على الفلوس يا سموير عمرها م ترجّع الموتى ... كان هكّا راني رجعت بورڨيبة حيّ بش يقطعلكم صرامك من اول و جديد...

شكان عليك كان تخرجوهم من الخصاصة الي هوما يعانيو منها و الي خلات ولدهم الشهيد خرج في الشوارع فالليل و يضرب الڨرودة و يلوج يلقاش ما ياكل و يوكل عايلتو ...

و الّا تحبو تنحيولهم الفلوس و تعطيوها تعويضات لجماعتكم متع حزب الغراب الازرڨ على اعوام الحبس ؟؟

و كيما ديما نقول : ان لم تستحي فانت سمير ديلو

ايا نبقيكم على خير