رسالة مفتوحة الى وزارة اللاثقافة :
انا مواطن تونسي عندي مشاريع ثقافية بديلة ننفع بيها جيلي و الجيل الي مبعدي و الاجيال الي مبعدها كان لزم، المشكل انو في وزارتكم من الشاوش للوزير ماكمش مستعدين تسمعوني ما وصلناش لمرحلة انكم تعاونوني ...
سيدي خويا الوزارة باركين عليها 4 فنانين من عهد بورڨيبة يمصو في الفليسات و يعملو في عروض تسخف من ناحية المحتوى ومن التقنية، الوجوه هي بيدها تتبادل في البلايص في الوزارة ومن عام فلوكة نوح ما تبدل حد في الوزارة
ميزانية وزارة الثقافة تقول ورثة ولا رزق السادة الولادة متع اسماء ما نحبش نجبدهم لا يجبدو مني الدم وترصيلي في بحث وثلب و الشي و الكذى ...
انا مواطن من بين المواطنين الي يوصل للوزارة وكل يوم يرجعوه على ورقة انا مواطن جيت نحب على ترخيص باش نعمل خيمات قراء باش ندفع انا فيهم دم ڨلبي فلوس وقلتولي لا، انا مواطن ما جيتش طلبت دعم اما جيت قلت نعطيكم افكار تحسن الثقافة ...
انا مواطن منيش من المناطق الداخلية اما جيت نطالبكم باش نقلكم الي الناس هذيكا زادة عندها الحق تسمع اسامي كبيرة تمشي لمهرجناتها ...
انا مواطن نقص تسكرة بسخطة لاف ومبعد تلغيوه قال شنوا ما فيبالكمش ...
انا مواطن منيش طالب فلوس انا مواطن طالب ثقافة للناس لكل ...
انا مواطن عندي الحق نقرى كتب تصلح مش نمشي لمعرض نلقاكم مرخصين كتب مسمومة ومانعين كتب تربي الاجيال باش تحب بلادها و تتعلم اتدافع على قضاياها ...
انا مواطن فديت ومليت من الناس الي تمص في فلوس الدولة باش ينشرو ثقافة استهلاكية ...
فديت و باش نطرشق من ارجع غدوة و البيروقراطية ...
فديت من العقلية المحبوسة في ايام ما ترجعش و اكثركم ناس ما تشجعش ...
انا مواطن نتوجع كيف نشوف جمعيات لبرة مالبلاد تمول في ثقافتنا و وزارة بلادنا عافسة فينا و دازة فينا ركبة ...
انا مواطن حزين كيف نشوف صحابي تخدم و تحلم اما يجي انسان بفلوسو يكسرلهم احلامهم انسان مدعم من عندكم مش باش يعاونهم اما باش يعفس عليهم ...
فديت من موسيقى مبتذلة تتعاود كل عام، من مسارح مسكرة من شارع ساكت من عباد نشرتو فيهم الخوف من الثقافة ...
كرهت وزارة عمقت الفجوة بين الجهات، لا الڨصريني يعرف فن الساحل ولا الساحلي يعرف فن الجنوب ..
نعرف الي ريقي باش يشيح اما ميسالش ...
وقيت باش تسيبو الفن للشوارع و تسكروها الوزارة خير !
Aucun commentaire:
Enregistrer un commentaire