jeudi 10 janvier 2013

التونسي بين البوس و الوفلوس


نهارين و الحيوط على الموقع الاجتماعي "Facebook" تتلبط بالبوس بعد مالشباب سمع بحكاية الـ"Couple" مراهقين شدوهم يبوسو في بعضهم في ماكن عمومي و حكومو عليهم بشهرين حبس، الشعب لكلو غاضو حالو كيفاش على بوسة الواحد ترصيلو في ڨلبو ...
كلي احنا قاعدين نشوف في الناس تبوس في بعضها كل يوم في الشوارع ... حتى باش يتبسمو لبعضهم يا ذنوبي لكلها تكش و تنش وخلاقها في خشمها و كان يلقاو يقتلو بعضهم ...
وكيما قال سقراط " حبو بعضكم يا دين الرب" و بعدين تو نتفاهمو في البوس !

الشطر الثاني يندب في خديه على الفلوس الي ما فماش و آش باش يسلكها و كان ماخلصش آش باش يصير فيه و هاك اللوغة، و الجماعة الي قال شنوا عندها دقة الملاحظة قالك حتى الموزعات الآلية ما فيهاش فلوس .. تي فيهم شكون يشوف في روحو فالحبس كان ما تصبتش انا حاولت نتخيل السيناريو الي شد بيه الحبس وصلت لحكاية مڨحولة الي السيد قام الصباح يلقى مرتو شادتلو راسو على قضية الشهر و فلوس الدروس الخصوصية متع الصغار قام بدل ساعة بساعة اخرى حل البواط آ لاتر يلقى فتورة الماء و الضو فبيها ضربو التريسيتي و نڨرو الدم قال يبدل الجو و يهبط يتدولش في الحومة و انما بحيثو يلقى روحو في احضان العطار الي يحب يخلص في كريديه و صاحبو الي يحبو يرجعلو الفلوس الي تسلفهم من عندو روح عروقو باش تخرج و هو يعمل في سيڨارو و يبعول في بواطت الضو بتورنيفيس ... سمع الباب يدق عطاها كعبة انشاء الله خير ... يلقى مرت مولى الدار في خلقتو تحب على الكراء لقى روحو بحركة لا ارادية طمزها  بالتورنفيس في عينها ...

و انا بين هذوما و لخرين قعدت انبّر ...

ايا نبقيكم ...

Aucun commentaire:

Enregistrer un commentaire