jeudi 22 mars 2012

المرصد الوطني للاشارات الربانية.


المرصد هذا مالحاجة الليكس ... حتى هكا مركز الاستشعار عن بعد ما يلعبوش 
لا كوابل لا بوطوات لا اونتانات لا برابولات. 
الشي رباني ...
اما فما شكون يكبتي مليح و شكون لا ...
فما الي يكبطي كتيبة و فما الي كبطي الصوت ... حتى لين توصل تكبطي الملتيميديا !!
و كان تحب على الـ"3G" ما عليك كان تفرطس، ماو كيما يقول المثل الشعبي " راس الفرطاس قريب لربّي" .

المرصد هذا الي يعجبك فيه ... ينجم يكبطي اليساري و الملحد و الزنديق و السوكارجي و الكافر و العازڨو و عدو الاسلام على بعد برشا امتار ... حتى زادة كان السيد في بر و "المستشعر في برّ" ...

المرصد هذا محتكرينو "المصفڨون" و "المصرفڨات" متع الحزب الحاكم الجديد وقاعدين يستعملو في هالتقنية الحديثة جدّآآآآآآآآآ في صفاحاتهم "الثورية".
هالتقنية هاذي ميكروسكوبية ما تتشافش بالعين المجردة من كل ثقافة ...

اما من اخطار هالتقنية هاذي انها تمرّض ... و المرض هذا معدي برشا !!
و ينجم يعمل اسهال دماغي لصاحب المرض (مثال : الياس الصيد، امان الله المنصوري).

و للاستفادة من هذه التقنية لازم يكون عندك خيال واسع ممزوج بالبهامة و السطاكة و قلة الحياء ...
و لكلّ من يريد الاستفادة من خدمات المرصد الوطني للاشرات الربانية ما عليه كان يتصل باقرب مقر لحركة النهضة او الاتصال مباشرة برئيس الحكومة

Aucun commentaire:

Enregistrer un commentaire