عايش فالكبارية و نعرف شنوا معناها انسان يرقد تحت الطولة و من غير عشاء ... شمعناها عامل نظافة ... شمعنها بطال ... شمعناها عبد ضعيف متخبي وراء الاجرام و الزطالي ... نعرف شمعناها ما عندكش حق قهوتك ... حق حجامتك م حمامك ... نعرف شنوّا لزهم على السرقة و النطرة ...
قلتوا علينا هوايش و مناش واعين ...
قلتوا علينا قلال حياء ... و والدينا ما ربوناش ...
ذميتونا ... سبيتونا ... ذليتونا ...
حكمتو علينا بالموت من غير ما تعرفونا ...
قمعتونا ... صوتنا خنقتو ...
تكلمنا ... بالقوّة سكّتونا ...
اجاو هوني تعلو الرجلة ... تعلمو الي هوني ما نطيشوش بعضنا
هوني الي عندو يوكل خوه ...
هوني ڨتلة السيڨارو نبشطروها ...
قهوة اربعة نترشفوها ...
القصعة الحومة تاكل منها ...
هوني تسمع ايجا بسم الله ...
هوني تسمع خوذ و كي يبدا عندك خلّص ...
هوني نعيشو بالقليل ...
هوني خدمة النهار ما فيها عار ...
هوني نحملو وسخكم و خمجكم ...
هوني نعيشوا زواولة اما رجال ...
سمعتو علينا برشا و مازلتو بش تسمعو ...
Aucun commentaire:
Enregistrer un commentaire