عقلية الانبطاحية و التخاذل ... الى متى ؟؟

ايا ڨلنا السلام ...

ها سيدي انا واحد مالناس نقعد باهت بعبات تهلل و تكبر و تفرح و تغني و ترڨص على انغام الانبطاحية و التخاذل و الذلّ ...

نقعد باهت كيف مواطن عربي يفرحي لانو مواطن عربي آخر ما حبش ينازل مستوطن اسرائيلي في احد الرياضات ... هاو مرّا في العاب متع دراشنوا وحدة متع جيدو ما حبتش و لخرى متع اسكريم و ليوم طفل فالشطرنج ...

وتلقى الناس تبرطاجي في تصويرتو و فرحانين تقول عمل انجاز تاريخي بش يزيدنا خطوة في تحرير القدس...

كي نشوف حاجات هكا نزيد نفهم علاش بن علي و الـ 40 حرامي كانو باركين علينا 23 سنا ... علاش معضم الشعوب العربية تاكل فالمسبط و حقوقها مفكوكة ...

براس والديكم لوقتاش هالانبطاحية و تطييح القدر ؟

فما حكاية ديما يحكيهالي الوالد  قالي قبل اليهود فالعالم الكل كان ياكلو فالمسبط و قدرهم طايح و كانو ديما يمشيو يشكيو للربّي (Le rabbin) من فاعيل الناس فيهم الربّي ديما يقولو قري ولدك بش يحارب جهلهم ... 

وقتاش العرب تعلم ولادهم الي الهروب من المواجهة ما يزيد كان الطين بلة و يزيد يبركهم علينا اكثر ؟

وقتاش يتعلمو العايلات في العالم العربي الي كيف ولدك يحكي في السياسة ما يسكتوش و تقلوش يزي البوليس ما يحبش ؟

وقتاش نعلمو ولادنا الي اسرائيل عدوّ لازمنا نربحوه و ما نخافوش منّو ؟

وقتاش نتعلمو انو بمجرد ان تبارز الاسرائيلي و تكسرو خليقتو هو الانتصار للقضية و ليس الهروب او رفض المواجهة ؟

وقتاش يفهموا الي بهروبهم الاسرايلي بش يطلع عالبوديوم و الدرابو متاعهم المعفط الي بش يتهز مش درابو الدولة الي كانت تنجم تربحو و تقصيه ؟

وقتاش و وقتاش و وقتاش ؟!

ايا نبقيكم ... فماش ما تفيقو شويا من مستنقع البهامة الي انتوما فيه !

عَــيَّــادَه | Femme de ménage

عيادة مرا تونسية تخدم معينة منزلية في احد الاحياء الراقية المجاورة لتونس العاصمة و جاية خصيصا من جندوبة بش تخدم الخدمة هاذي و تسكن فالمحمدية ...

 عيادة طالعة فالمترو هي و بنات يخدمو كيف كيف معينات منزلية و تحكي فرحانة على تحضيرات عرسها ...

 عيادة تعرفت على عامل حضيرة بناء هو زادة يخدم في مرمة مجاورة للدار الي تخدم فيها ومنها تستدعي في البنات باش يعاونوها في قضية العرس ...

عيادة تخلص 250 دينار مقابل 8 ساعات عمل 6 ايام فالاسبوع ... قاتلها الضعف م ضهرها قوس على صغر سنها و عندها جميع انواع الحسسيات مالغبابر الي تعاني فيها كل يوم ...

 عيادة اطرشقت بالبكاء وقت الي سأتها صاحبتها : "مرتاحاشي فالخدمة" ... وبين الدمعة و الدمعة قالت :" ربي ينوب ما خير..."

 و كملت تفكرت دارهم الي في جندوبة الي معادش تنجم تبعثلهم فلوس على خاطر تشري في دبش العرس ... تحكي على بوها المريض و امها الي تفكرها المولى على بكري مالامراض و خوها الي الحبس عندو كي دارهم ...

عيادة مالفرحة متاعها الي لقات راجل "يسترها" للبكية بالحرقة على شكون بش يستر دارهم ...

عيادة تبكي على ايداها الي حراشت مالجفال و صوابعها الي دمات مالخيش و قشرتها الي تحرقت مالشموسات ...

عيادة تبكي على ساقيها الي ما عادش تهزها و تتشكى مالوقت الي مش لاقيتو حتى بش تاكل ...

عيادة تبكي مالغزرة الدونية  متع العباد ...

التونسي طحان بطبعه ؟

شنوا تحس كي تشوف واحد مازال يعيط يحيا الرئيس ؟

شنوا تحس كي تشوف واحد يبوس في يد الرئيس ؟

شنوا تحب تفهم من واحد يعيط تحيا الثورة الي هي ثورت كرامة و هو مطيح من قدرو و يبوس في يد رئيس ؟

شنوا تحس كي ناشط حقوقي سابق و رئيس مؤقت حالي يمد في ايديه للبوس ؟

شنوا معناها واحد يدافع على السيد الي باس يد المرزوقي و على المرزوقي الي ماد اديه للبوس ؟

حاجتين يا الشعب هذايا مش متع كرامة ... يا الشعب هذيا مش متع كرامة !

يا مواطن متع راس لانوف فما 300 بشر ضحاو برواحهم بش سي سيادتك تهز راسك مالغرم و الطحين للشوشة الي كنت عايش فيهم، آلاف نقب بدنهم الكرتوش باش سيادتك تعيش راجل و ما تتذلل لحتى حدّ ...

اما زايد الطحين و الرخص في دمكم ... فضحتونا قدام العالم ... الي يسو و الي ما يسواش يحكيو علينا ...

السعوديين الي يبوسو خشم الملك متاعهم و يفركو فيهم علينا ... قال شنوا دولة صارت فيها "ثورة كرامة" يبوسو في يد الرئيس ...

وسي الطرطور فرحان ماشي حاط الفيديو في الصفحة الرسمية لرئاسة الجمهورية ... معنها خلق ربي الكل تفرجت فيها ...

و الفينومان الغريب الجديد متع طحان من تحت طحان قال شنوا نورمال السيد باسلو يدّو و المرزوقي مش بلعاني و 

يلقى في حل بش يخرج الحكاية نورمال، ماو عادي ناس مزرصة فالطحين و راضعين دين امو فالحليب ... ما مزال كان بش يعطي ترمتو !!

بن علي كي جا باش يقول "لقد بلغ شعبنا درجة كبيرة من الطحين" غلطوه و قال درجة كبيرة من الوعي ... و هالجماعة الي مالنوع هذا الي لا عاطي لروحو لا قيمة لا قدر كيما بركو علينا بن خرى  عام ناوين يبركو علينا هالرهوط الله اعلم قداش ...

[برشا كلام زايد ... برشا جلال بريك]

حداثة ؟

بجاه ربكم فهموني حاجة ... شمعناها الحداثة ؟! بالكشي انا مش فاهم و الّا رجعي و الاّ جاي من كوكب آخر ؟ 

فهموني كيفاش انو تراو الي الحداثة انك تشد تمرڨ فالناس الكلّ بالسبان العاري و اللّابس على خاطر طريقة تفكيرو ما تتماشاش مع طريقة تفكيرك (هذا كان جيتو تفكرو في زوز) ... كيفاش توصل تعطي رايك في عبد و انت ما عطيتوش وذن تسمع ؟ 

فهموني بالكشي حداثتكم ما نعرفهاش ؟ و بالكشي كيما يقول المغيربي الحداثة انواع سيدي خويا ؟

و الا الحداثة تستعملوها قناع تغطيو بيه جهلكم و تخلفكم و تبرّروا بيه منطقكم العادم (وهنا نلوم على روحي زادة) ؟

بالكشي الحداثة الي تحكيو بيها حكر على مجموعة فقط و الي ما يعجبناش نطردوه منها ؟

بالكشي الحداثة "" ؟

بالكشي الحداثة انك تكون فرخ عوق و منطقك عادم ؟

بالكشي الحداثة انك تعمل فو بروفيل فالفايسبوك و تكتب ارتيكلوات بلا ساس و بلا راس و تهتك اعراض الناس على الماشي و الجاي ؟

بالكشي الحداثة تعلمك تقصي مجموعة لمجرد انتمائهم لطايفة ما تعجبكش ؟

باقي مانيش فاهم و يظهرلي مانيش بش نفهم جملة !!!!

الرهوط في باكوات

الشارع التونسي فترينة متع رهوط مڨلبة، لكلها مكشبرة، تڨولش سمعو الي التبسيمة حرام ولا حاجة هكة ...

تطلع في المترو تفدّ و روحك تطلع، ثنية متع 4 ادراج تحسها كاينها اعوام، الي يحكي فالتليفون و يعيط تقول في الخلى المخلي و ماعندوش ريزو، و الي ينفخ و يافّف، و الي يطلع يعفس و يرفس وشاري البلاء و الي تلقاه شاد الباب فماش ما صاحبو ينطر حاجة و يڨطعو، و الي تهبطلك طاكل متع ديفونسور صحيح و مخضرم فالباب و كي توصل قدام الكراسي تولي تكوع و تتشوكع فماش ما يخليوها تقعد، والي ناقصتو غلوة و الا ناقصتها غلوة و الي "Papa" ما نجمش يوصلهم يطلعو يتشقنسو فالمترو و مبهمين فالعباد تقول هابطين من مجرة اخرى ...

و خلينا مالكار الصفرة عاد، ما تسمع كان الخلاص صوتو يصوني و هو يعيط برا للوسط يرحم والديك و لا قدم الوسط فارغ عيش ولدي و يبدى يضرب على الحديد بالفلوس بش الشوفور يسكر الباب و الي مستانس بالكيران باز يعرف شمعنتها "زين الباب يا حمادي" ... و في شطر الثنية باس بش تسمع صوت واحد يعيط مالفجعة "آآآآاه صطوشي (تاليفوني ... الخ)" و كان لحمة و شدوه السارق تسمع كعبة دور الكار للمركز يا حمادي، و كان طلع كونطرولور تلقى شكون يتلبد في براس لحنينة خوك زوالي و ما عنديش باش نقص و الكونطرولور يعيط ... تساكركم و كوارطكم في ايديكم و تلقى بالطبيعة شكون قاص و شكون برجلة ماد بطاقة التعريف ...

الخرافة تفرق بين رهط و رهط ...

و كان مشيت على ساقيك يا ويحين ... الاشكال الهندسية لكل تشوفها، في تونس الوان القشرة متع بني آدم زدنا فيهم، من قمة الابداع تلقى بشر لونو اخضر و لوكو اخضر منّو، و الي عاطي على الازرڨ و شويا "mauve" و فما الي كي تجي تثبت في لونو تتخبل بالحب الي مغطي الخلقة متاعو، و بالاخص كي تبدى تحوس فالآفيني عاد ... غادي وين خلات بالحرام ساعة على ساعة مذابيك تفرڨع دين والديهم العباد على ما يعملو حسّ، الي يبزنس و الي تتزبر و الي زعمة زعمة يحكي فالتاليفون و الي يزمر و الي مزمر و الي تحت المنقالة يتڨزدر و الي يترنح و الي حيط يكب و حيط يقعد و الطلعة الجديدة تلقى ساعات واحد يكبّر و على اي حاجة يقوم يستغفر و الي يكفرك في وجهك و الي ناوي يشلطك و الي شدوتو الضحكة و الي بالشهقة يبكي و الي كيفي باهت في عجب ربي !!

اي اي ما نسيتهمش الي بكراهبهم... التونسي تلقاه الاولاني في الصف و يزمر تقول الضو بش يخاف و يتبدل اخضر، و ساعة على ساعة يتبلنجالهم واحد في الكياس من حيث لا تعلمون و الفرانات الساك و التكسيات الجماعية الي ادوبل من غير ما تشاور و الامبوطياج و التزمير و هو واحد ضرب لاخر في عركة و في عمر كونسطا و في معاينة الخبير وفي استنا الآسيرونس و في كرهبة معطلة الدنيا و واحد يقول باز مرا الي تسوق و في واحد حارق الضّو و في واحد تقول بش يفوتو شطر عمرو كان يروح في درج زايد في كورتاج عرس مسكر الثنية، كيما فما شكون يتزبر و مبلع الموزيكا فوندو و يشطح بين الكراهب، وفي موكب دبلوماسي ولا حكومي متعدي يسكرو الكياسات لين يتعدي سي السخطة الكبيرة، في "zone bleu" و في الشنڨال الي يهز ما يرد في ما تلقى وين تحط الكرهبة في الباركينڨ الي يملى ويفرغ و في شبيني جيت منا كيف تتبلع في الكياس و في تدخل في زنقة ما تعديش ...

شبيني تحليت فالحديث انا ... ايا انّستو !!

هم لا يعرفون

انهم لا يعرفون معاني الوطن و المواطنة ... 

الانتهازية دينهم و التجرذن لغتهم و التكفير نهجهم و شعارهم ... لا يعرفون معنى ان تكون مغتربا و انت في وطنك و ان تحترق شوقا للقمة كريمة و ان تبكي من شدة البرد و ان تنزف قدماك من الحفى و ان يحترق جلدك حرارة ... 

يصبون لتوحيد امة و نحن نحارب من اجل ان نوحد وطنا تشتت ابنائه بين يمين و يسار و مسلمين و كفار لمجرد تمسكهم باديوليجياتهم

انهم لا يعرفون معنى دمعة ام استشهد ابنه من اجل ان تطلق لسانك و تقول ما تشاء ان يكتب قلمك ما تحمل في صدرك دون ان تخاف احد ، انهم لا يعرفون معنى الم رصاصة مزقة صمت جريح و جريح خاط فمه لم يجد حقه  ...

انهم لا يعرفون معنى ان لا تجد في جيبك مليمات تقيك من الجوع و العطش، معنى ان تنام تحت سقف عار، معنى انه لا وسيلة لك للاتصال بالعالم الخرجي، معنى ان الشارع اصبح يشبه الجدران الاربع لسجن انفرادي، تعد فيها الايام في انتضار ان تموت ...

انهم لا يعرفون معنى ان ينتهي بك المطاف و النار تلتهم جسدك، معنى ان يدفعك اليأس ان تنهي حياتك بيديك ...

انهم لا يعرفون سوى اقتلوهم و ارجموهم ... انهم لا يعرفون سوى هتك اعراض من سمح لهم بان يتكلمو بحرية ...

انهم لا يعرفون سوى مساوء الاخلاق لا غير !!!

عم بشير

بشير العياري مواطن تونسي عمرو 52 عام، عندو برويطة يبيع عليها العضم المروب و الكسكروتات قدام قهوة "الاسكال" في حي ابن سينا ...

عم بشير عندو شهادة تقني مهني في الانارة، يقول القايل علاش ما يخدمش بيها !

عم بشير كان يخدم بالشهادة فالتسعينات و كان يخدم مع شركة متع تركيب الانارة في العمرات و الشركات، نهار صارة حريقة في عمارة من العمارات و كونو تقني في الشريكة و مولا الشريكة صاحب نوفوذ، هز هو القضية الكل على ضهرو و تحكم ب 7 سنين حبس !

عم بشير عدا منهم 4 سنين و خرج، حاول انو يعاود يخدم بالشهادة الي عندو اما الشركات ما حبتش تخدمو على خاطر عندو سوابق عدلية ...
ولا عم بشير عمل هاك البرويطة و يبيع فالكسكروتات قدام القهاوي عندو قريم الـ 8 سنين توّا، عم بشير يقلي ناكل من زوز فرنك بمعرفتي و لا نتذل من الشركات الي على سنين حبس ظلم حڨروني و ما خدموني ...

عم بشير عندو زوز ولاد ... واحد فيهم حرق لايطاليا ايمات الثورة و لاخر يعاون فيه على هم زمان و الخدمة في البرويطة

عم بشير يحبوه الناس لكل على خاطروا ناس طيبة و حتى مولى القهوة يخليه ساعات يخدم لداخل كيف يبدى الطقس خايب !

عم بشير بالرغم الي زوالي، يبدى يغني و زاهيتلو ويعيط الي ما عندوش ياكل بلاش و كي تحل معاه يتفكرني، يبدى شايخ و عامل جو ويفدلك مع الناس لكل باش ينجم يعدي نهارو !

عم بشير آخر الليل يكركر البرويطة و يروح في مكتوبو زوز فرنك و في ڨلبوا غصة و في مخو حكايت الي كلاو من عندو الكلّ ...

عم بشير موجود في كل حومة شعبيه و قدام كل قهوة ... اما شكون يعبّرو !

الكبارية و التكنولوجيا !

ايا على سلامتكم ...

السادة جماعة المشغلين متع التليفون و الا غيرهم متع انترنات و فازات كيما هكا، بش نحكيلكم حكاية زبورة ...
في عوض الهيلولة و الهيلمنات و الافيشوات الي معلقينهم فالحومة و 3G و مش فاهم شنوا آخر و اشري من عندنا تربحنا و ايجا نزبكوك في طرف اونڨاجمو على طرف فاتورات مالحيط و كونسوماسيون ما عملتهاش

جيتش سألت على حالت زبور ام الرزو 3G في الحومة تي حتى الـ 2G تمشي بالمشطة و ساعات نطلعو فوق السطح بش نعملو كلمة فالتاليفون و برا عاد كان الليل ليل و جماعة الاوفروات بداو يستغلو فالستغلال الفاحش للبوند باسونت و قتها مشينا انيزكو و ما نخلطوش معاهم حتى على كلمة ...

في عوض هالملاين الزرڨة الي تصرفي فيهم على التسويق متع سلعتكم الزبالة خممتوش فالمناطق الي ما تبعد على العاصمة بأقل من 5 كم تجيو تركبو بوطو و لا زوز ميسالش خلي نتكمو معاكم كلمة و الا خلي نستمتعو كيف غيرنا بالـ 3G ...

هوني فالكبارية نحمدو ربي كي واصللنا الفيكس هعهعه ... اما ابكي كي يبدا آلتليفون ديرونجا ... يڨطعولك بصاصتك بش يجيو يصلحو و خليونا عاد مالـ"" تي بالحرام شي يبكي مش لعب نعمل كونطراطو متع 4 ميغا نيكني كان خلطولك شطرهم شويا مالمزود و شويا مالتيليكوم الي خيوطها خززت و ندات و بواطاتهم الي نتانت !!

ايا نخليكم خلي نمشي نيك بورديل للتيليكوم توّا !

تتفكّر ؟

لكل عون امن، باش نفكر شنوّا صار ...

الفصل الاول : من 14 جانفي و ايام العسة
الى كل عون كان يتلبد وكل ما يشوف ولاد حومة عاملين باراج يبول على روحو مالفجعة و يمد كيف الذليل بطاقة التعريف متاعو و ولاد الحومة يطلعو دزو في دورة فالباڨة يشوفو فماش حاجة و يفكو المطراك و يفكو السلاح و يسلموهم للجيش ... كان كيف الذلي يخبي روحو و يمشى الحيط الحيط و فما شكون ما يخرجش خشمو من شباك دارو بش يتنفس ... خايفين الموت و خايف ردة فعل الشعب الي قلبو معبي عليهم !!

الفصل الثاني : تكوين نقابة و الاعتصام بالقصبة

اول ما ركحت الدنيا كنتو اول ما طالبتو الزيادة فالشهرية و كان الشعب تعاطف معاكم على اساس الي شهريتكم شويا و على العذاب الي شفتوه في عهد المخلوغ برا السماح كان زادوكم فالشهرية ... كانت ساعتكم الزايدة بـ 100 مليم تخدموهم فالقوايل و الليالي فماش ما ادبرو دينار زايد ... فبيها زادوكم 140 دينار كاملين فالشهريه الي ولات معتبرة  بالنسبة لمستواكم الدراسي المعفط ... وليتو على الاقل تنجمو تقاومو الغلاء مش كيف العاطلين اصحاب الشهائد العليا الي مش لاقين حق كسرتهم

الفصل الثالث : وقت المحاسبة

وقت الي سمعتو الي بش تصير تنظيفة للوزارة من الاعوان و الاطارات الفازدين قومتو الدينيا و انسحب اكثر من 2000 عون عن العمل و اعتصمتو و خليتو البلاد مسيبة على طلق ذراعها بش تحميو الايادي القذرة الي قتلت و جرحت خواتنا ايمات الثورة ...

الفصل الرابع : الغل الي في قلوبكم

على مدى جمعتين لقيتو ما تعملو و حلالكم الضرب في الزوالي و البطال و الي يحب يعبر !!
بالزلاط بالدبابس بالمطراك بالڨاز و حتى بالكاسكة ما فلتو حد اضرب و آش يهمك !!
نسمعو فيكم بوذنينا هنا رجعنالكم يا كلاب و تحملو النهضة الي انتخبتوها، شفنا الشر و النقمة الي في عينيكم و الكلام المرزي مالحزام اللوطة على لسانكم ... لا فلتو لا صغير و لا كبير لا مرا و لا طفلة !!
الي راسو تحل و الي ساقو تخسرت و الي سال م فمو الدم و الي داخ بالڨاز و الي طاح ما في عينو بلة و عفستوه و الي ذليتوه و الي للطبيب ما حبيتو توصلوه و الي بالكف صرفڨتوه !!

نحبكم تعرفو الي راكم كيما تذليتو ايمات الثورة عادي نعاودو نذلوكم ... نعفسو عليكم و ما نرحموكم ... لازم تعرفو الي ما نهبطوش روسنا و منكم ما نخافوش ...
و كيما يقول المثل البير بير و الماجل ماجل و البوليس عمرو ما يولي راجل ... وفي رواية اخرى طول عماركم تعيشو طحانة

موتوا بغازكم

Photo de Med Amine Ben Aziza

9 افريل 2012 ... المجتمع المدني الجمعيات و المنظمات قرروا انهم يقوموا بتحرك سلمي قصد الاحتفال بعيد الشهداء ذكرى 9 افريل 1938 و قتها جدودنا ماتو في شارع الحبيب بورڨيبة و الشوارع المجاورة ...
شاهدنا احتفاليات كبيرة زادة من اعوان الامن الي عالصباح بكري منشرين في الشوارع لكل ... و انا متعدي على الحبيب بورڨيبة نشوف فالشر و النقمة الي على وجوههم و بعضهم يضحك شايخ و يغزر للقنابل متع الغاز الجدد متاعوا و فرحان
وحدات التدخل ولا كيما سماوهم وحدات الامن العام فيهم فروخ ما يفوتوش 22 عام ... في عينيهم حقد مش عادي و كانو يتصرفو من غير حتى اوامر من الكوادر متاعهم ...
والاهم من هذا الكل المليشيات الي اقر ضمنيا علي العريض انو بعثهم باش ينهالو على المتضاهرين بالضرب بهراوات و عصي زيتون ...
الضرب و السب لبارح الي شفتو و تضربت بيه و سمعتو حتى في ايام بن علي ما كانوش يسبو بيه و يضربو بيه ...
عباد خارجة مش لتطويق الاحتجاج اما الاعتداء الممنهج عليه ...

الحاجة الليكس انو الڨاز جديد و اغلبيتو مستورد مالبرازيل و الماطراك معادش تنفع ولاو يستعملو فالهروات و عصي الزيتون تقولو ينشو فالغنم

العباد كانت استقبلت القادمين من سيدي بوزيد  و قراو الفاتحة على روح الشهداء و غناو باعلى اصواتهم النشيد الوطني و بداو يتمشاو في شارع محمد الخامس رافعين الاعلام وقتها لقاو الحاكم مسكر الكياس بعيد على شارع الحبيب بورڨيبة حكاية الــ 500 متر و قعدو واقفين المرة الاولى و حاولو يزيدو يتقدمو اكثر شويا ...
ولاو سيبو علينا كلابهم المسعورة يضربو و يسبو وبوليس يعمل بالحرف الواحد "مش انتوما طلعتو النهضة، هانا رجعنالكم" ...
و الي اتعس منو الكل انهم اعتداو على حقوقيين و مدونين و صحافيين اجنبيين و ممثلين للشعب فالمجلس التاسيسي ...

كنت انا و مجموعة من اصدقائي من حركة فيق تعرضنا للضرب ...
وزادة اللمدونة فاطمة ارابيكا الي ايدها تكسرت ..
انا وحد مالناس ساقيا لكلها بلايص زرق ضربوني و حبو يبركوني فالقع  ...

هوما منعونا من التضاهر فالحبيب بورڨيبة و اغلب القمع الي صار في الشوارع المجاورة ... جون جوراس ... نهج مرسيليا ... شارع باريز ... شارع مدريد ... وصولا الى البساج

و كيما قال الطاهر الفازع الحكومة غلطت بين :"fête des martyrs et faites des martyrs" ...

بطّال و جريح و الاجر على الله

ايا قلنا السلام ... اما باين فيهم مش بش يخلونا سالمين !

5 افريل 2012، جريح ثورة وصلكم للكراسي و اموّ و اصحابو و ممثلين عن المجتمع المدني المتضامنين مع مطالب الناس هاذم كلاو طريحة نباش القبور و نعتوهم بالشرذمة الضالة و الملثمين و المخربين و كاينو بيان متع الزعبع ايماتو لخرة قبل ما يتڨلع ... فما الي هزوه للاستعجالي على ما تهرّى خبط و فما الي طلع للباڨا ما هبط !
و الي هزوه معاهم كيما صلاح الدين كشك رئيس حزب القراصنة و مريم منور رئيسة حزب تونس و نضال الصيد من مجومعة "Femen Tunisia" ...
و المشكلة انو هذا الكل صار قدام وزارة التكذيب و الترهدين الانتقالي !! (حقوق الانسان و العدالة الانتقالية) ...


7 افريل 2012، اتحاد اصحاب الشهائد العاطلين عن العمل قررو انهم يتحداو الحضر متع التجمهر و التعبير عن الرئي سلميا في شارع الحبيب بورڨيبة و يذكرو الحكومة بانو الثورة المحنونة الي عملناها كانت بالاساس للمطالبة بالشغل و العيش الكريم و الي حزب الغراب الازرق كان يمني فيهم بـ 500 الف موطن شغل ....
العباد هاذم جاو من كل الجهات للتعبير عن حاجتهم الملحة للشغل و قساوة الضروف الي يعيشو فيها ...
و الي حق التضاعر في الحبيب بورڨيبة افتككناه فالثورة باش نعبرو على راينا في نطاق السلمية و من غير ما نتشعبطو على المنڨالة ...
من الواضح انو العريض ما يعرف الرجلة كانن فالمطراك !! و سمير ديلو تنحي عليه فيشة التكذيب ما ينجم يعمل حتى شي آخر ...
الڨرودة لبارح استعملو جميع انواع العنف الي ينجمو يعملوه ... يضربو بالكاسك و بالهراوات و بالڨاز عاري و لابس ... و ضربو احد صديقاتي المقربات حنان فقيه على يدها و خلفولها كدمات قوية و يدها لكل زراقت ...

الوقفة و المسيرة الاحتجاجيتين كانو سلميين و شوهوهم كيف ما حبو بالاعلام لمجرد مسهم بقضايا يحبو يخبيوها عن الرئي العام ... اما المواطن التونسي معادش يتفرج الاخبار بركا لكن يسمع من عند ولادو و يشوف على الفايسبوك شنوا صاير و كل شي موثق بالفيديوات و التصاور  ...
الوزارتين هاذم بتصرفاتهم الحيوانية ماهم يعاونو فالبلاد في حتى شي بالعكس قاعدين يدزو فالمواطن بش يلتجئ للقوة مرة اخرى بش يفتك ابسط حقوقو ...

شكر خاص لماعلي الوزير المغامر المغوار عبد الوهاب معطر على الحلول الجذرية فالتشغيل انو الناس لكل بش تصبح بطالة في ضرف عام !!

9 افريل 2012، بش تواجه ميات الآلاف من المحتجين فالجمهورية لكل الي بصوت واحد باش يعيطو "فلا عاش في تونس من خانها" ... و سيفتكون حقهم بالقوة !

ضربني وبكى سبقني وشكى !

الي قاعد نرا فيه انا ليوم من "تيتّم" سلفي و بكى و نواح ، هوما و اليوسفيين و المحبوسين في نظام بن علي ... وانهم يستعملوا فيها كسلعة مربحة يسكتو بيها الشعب و الصحافة و زادة باش يلمعو تصويرتهم قدام الشعب الي يتبع فيهم كيف العلالش !!
اما الغريبة مش هوني، الغريبة وقت الي يستبيحو اموال الشعب و اعراضهم و دمهم ...

نلقاو السلفيين يشدوا يمهدو فالعباد بالطرايح و يفكو في املاك دولة باش يسكنو و يخبيو فيهم الخور متاعهم و وقت الي المواطن يتشكى منهم يهيجو و يقولو نحنى خاطينا نحنا ناس ملتزمين نتنعوا في اهل السنة في ما فيه صلاح للبلاد و يوليو مجاهدين ابرار لا يرفعون السيف سوى في وجه العدو للدين ... وقت الي الناس هاذم يشريو فالشبوك و يتهمو بالباطل في عباد بانها لمجرد تعبيرها عن رأيها بالزندقة و الردة و الكفر و العمالة

الغريبة وقت الي نلقاو حكومة تلوج منين تمشمش فلوس الشعب و بانا طريقة باش تركحهم و تبلفطهم كيما كان يعمل المخلوع باش يسكتنا على سرقات انسابو، تجي الحكومة و تقرر و ما نعرفش باناهي صيفة تقرر تخصيص 750 مليون دينار لتعويض سجناء الترويكا لما تعرضوا له من سجن ايام القمع النوفمبري ... اي اما على ما فيبالي واحد شاد الحبس من اجل الوطن ما يستحقش تعويض قدر انو يستحق تحقيق مكاسب ثورية من حريات، نيلسون ماندلا عدى 27 عام حبس و ما طلب حتى فرك بالعكس خرج و زاد عطى من جهدو لبلادو باڨ تولي مثال للبلدان الافريقية فالنمو الاقتصادي ... وقت الي المواطن التونسي غليتولو حتى في حق قهوتو و كي تكلم على حقو (كيما الجرحى) كلاتو هو و امو العصى !! و بربي سؤال : هل ترضاه لامّك ؟

خلينا عاد من جماعة النهضة الي النهار و طولو يتبكاو ماليسار المتفرنس الماسوني الصهيوني و متع العصى فالعجلة جملة !! بربي بش نسألكم : شكون بدا بسياسة الاقصاء ؟ شكون شوه صمعة شكون بابشع الطرق قبل ما تبدى الانتخابات ؟ شكون انتهك اعراض العباد ؟ شكون قبل اخمج ما فمّا فالتجمع ؟
ليوم تقومو تبكيو للشعب الي اليسار يحب يضربكم و يطيحكم بابشع الطرق و انتوما ما خليتو ما عملتو ؟
تقومو تبكيو و انتوما وزرتكم تضرب فالجرحى و تهين الجهات و تنكل بالامهات ؟

لكلهم عملين سياسة ضربني و بكى كيما آل صهيون الي كل ما يعملو مجزرة يقولو مش منا اما مالهولوكوست الي صار هاكا العام !!

رحلة الاحد عشر

ايا على سلامتكم ...

انا كمواطن تونسي عاسي جدا، نطلع يوميا في وسائل النقل العمومي و بالاخص المترو، الي يلم الشعب لكل، و نمشي على الــ 11 في جميع ارجاء الوطن الكبير، يا سيدك بن سيدك امنية حياتي نلقى واحد يتبسّم في وجه خوه !!

المقام الاول : المترو الخفيف

يا ديني ما تلقى كان الي يحكي فالتليفون و يعيط تقول بين زوز اجبال، و الي ينفخ و يأفف و الي يستغفر و الي يطلب و الي ينطر و الي تبكي و الي دايخ و دايخة و الي تركبلو يقوم يصيح و الي المترو يبدا يجري و هو يجبد فران تلقهى الناس ملوحة فوق بعضها و الشفور يعيط ابعد عالباب خلي يتسكر يهديك، و كان ما سمعو حد يمشي بالباب محلول، و الي يطلع ينتج و يفك و الي يستناك فالمحطة بش يسترزق منّك، وخلي عاد من هاكا جماعة الكريم متع الله كل واحد عندو ديسكور محضرو مليح بش يستعطف شويا عباد و ينطر خبيزتو الباردة !

المقام الثاني : شارع الحبيب بورڨيبة

اكثر شارع  رمادي شفتو في حياتي، في عباد ملونين اما مش في حوايهم، اما في طبايعهم و في خلاقهم، و انا عنيا ماشيا امين ايسار كيف الكورة بين الذكورة و البناويت، الي ماشي و شاد تاليفون و شفور تكسي يزمر عليه بش يبعد، و الي طالع بكرهبتو فالمادة و الي يدز في البيدق في الكياس، و الي طيش بونتا متع سيڨارو و الي يعيط لصاحبو من بعيد، و كان فما شويا نصابة تسمع العشرة بلف، و هبلي راجلك بدينار يا مدام و هات من هكا القلة ... والكيران الصفر الي معبين بالڨرودة شادين مادّة الوسط و يستقاتو من بعض الشباب الي هابط يبزنس فالآفيني !!

المقام الثالث : باب بحر

المدخل الرئيسي للاسواق وين يهبطو التوريست يتفرجو في عجب ربي، التبزنيس و التسمسير و التقطير و التكحيل و كان فما نطرة، و تفضل مدام و تفضل موسيو ، و "c'est moins cher que gratuit" و "bonjour la gazelle" ... اما تبركله عليهم مولتيلونڨ ... و فما الي يطش طشان ، و المواطن التونسي تلقاه مزروب بش يتعدى يعثر في توريست، و الي يكركر في برويطة و يعيط برّا ساڨيك لين تخلط للشواشين بش تتفرهد شويا و تقعد تعل كويس تاي منعنع و تقوم تكمل ثنيتك !

و في وسط هالمقامات الثلاثة مزلت نلوج على تبسيمة في وجه مواطن، و الي تلقاه يتبسم للريح ما تنجم تقول عليه كان "البوهالي السعيد" !

اما مانيش مأيس الي بش نشدو يتبسم للعباد لولاني بش نعمل انا وياه تصويرة ...

الى السيد وزير الداخلية

سيدي الوزير على ما لاحضنا فالمدة الاخيرة اهتمامك الكبير بالشارع التونسي، و تكبدك المشاق في تحسين صورة راجال الامن و توطيد علاقاتهم مع المواطن، فبحيث صار رجل الامن في خدمة المواطن في كل المواقف !!

مثل الموقف الذي رصدناه اليوم امام وزارة حقوق النسيان و العدالة الانتقامية، حيث قام اعوان امن حزبكم المصون بواجبهم على احسن وجه و قد برهنوا على كرم ضيافتهم، وقد قامو بتدليك عضلات و "تكسيل" عضام جميع من كانو حاضرين بدو استثناـ و بدون معاملات جانبية و لا رشاوي 

كما قد وردنا انه من حسن الرعاية التي لاقاها الجرحى و اهاليهم انهم شفوا تماما من اصاباتهم البليغة و تم اسرتخراج الرصاص بعناية فائقة و بدون عناء يذكر ... و ان جرحى الثورة لكم شاكرون !!

ولم يدخر سيادتكم اي جهد لتوفير قوى خاصة في ميدان التطبيب الطبيعي و ذلك باستعمال الهروات و الخوذات و الغاز المسيل للدموع، طبعا بدون ان ننسى الثناء على وزير حقوق النسيان السيد سمير ديلو الذي لم يدخر جهدا لوصول هذه الفرق المختصة فالعنف المفرط على جناح السرعة  !!

انّ الشعب التونسي يناشدكم و بقية الوزراء المحسوبين على حركة النهضة و يشد على اياديكم للبقاء على نفس النهج في خدمة المواطنين و خاصة ذوي الاحتياجات الخاصة منهم و الذين ضحّوا من اجل اخراجكم من الزنازين النوفمبرية و القمع الدامي الذي عانيتموه !!

من موقعنا هذا نخصّ سيادتكم بوابل من التصفيق الحار و البندير البندار .... سيدي الوزير سير سير و نحن ورائك بالمزامير ...

والله وليّ التوفيق !

الــبنّـــــاي | Le Maçon

اقوى حاجة ريتها تعبر على الي في طاسة بعض المواطنين التوانسة (ما نجمتش نسميه مخّ) ... هي هكا صندوق عجب متع موزايك اف ام ... كل يوم تسمع مصيبة نوع !!

اقوى حاجة شدت في مخي الي واحد صاحب شركة مقاولات يعيط و يصيح يا توانسة رانا ما عندناش بطالة و شد ما سيب فالآخر قال انا عندي جمعتين نلوج على عمال حضاير بناء ما لقيتش !!

هالسيد هذا نحب نقلو يعطيك الصحة ما قصرتش كي خلقت مواطن شغل ... اما قلو ها عامل الحضيرة الي تلوج عليه قداش بش تخلصو ؟! تعرف قداش عندنا من معطل صاحب شهائد عليا ؟! علاش المواطن الزوالي هارب من عمل الحضائر ؟!

اكيد ما يعرفش انا نقرى و نخدم في ميدان المقاولات و نعرف النوع هذا مالعباد الي يجيبلك بال 50 خدام يجيب عليهم الماء 5 ايام فالجمعة و 8 سوايع فالنهار يخدموا فالنوار الله لا قدر يصيرلو حادث في الشانطي ما يحقلو شي و زيد فوق هذا ما عندوش ضمان اجتماعي يضمنلو كبرو و يعطيه آخر حلقة 250 دينار كان ما ڨدموش جملة و زيد على هذا السب و اللعن و الشتيمة النهار و طولو و تلقاه الخدام مسكين حاصر دموعو في عينينه على خبزة وليداتو يجيه نهار يطرشق و يبطلها الخدمة !!

في تونس عندنا اقل شي 700 الف حامل للشهائد العليا (جامعية) بحكم تكوينو الاكاديمي ما يعرفش يشد بالة و لا يخلط المورتي و لا يبش الليڨة، و معا هذا فما برشا و بحكم الضروف القهرية الي يعيشها من فقر و خصاصة و الي فوق هذا جيهتو مهمشة خدم المرمّة و هو تلقاه عندو اقل شي شهاسة تقني سامي، و كيف العادة اصحاب شركاة المقاولات او شركات المناولة عند وزارة التجهيز يخدموه اما ياكلولو عرقو !!

فهمت علاش يا سي السيد الي المواطن البسيط ولّا يخير يعمل نصبة و يبيع الكسكروتات و الدخان و يبدى مڨطع مالحاكم و لا تكلّو انت عرقو كيما عمل معاه غيرو ... على خاطر هالمواطن البسيط معادش عندو ثيقة فيك ... على خاطر يحب يضمن ادنى حدّ من الكرامة !!

كان انت تولي تضمنلو شهرية كاملة و "ادكلاري" عليه و تصب عليه في دار الولاد "CNSS" تو يجيك يخدم ساقيه اعلى من راسو !!

مالآخر اعطيوه حقّو و يدّكم !

شكون بش يدافع على البلاد ?

بعد ما سمعت تصريح قايد الاركان الثلاث مت الجيش الجنرال رشيد عمار على اني صبرو نفذ من اعتداء السلفيين على المواطنين قلت لباس البلاد مزال فيها رجال يخافو على حرمتها ... ضربتني صاعقة هبطتني رماد وقت الي السيد هو بيدو نفا ما نسب اليه !! 

المشكلة مش في انو ينفي ولا راس لانوف ... المشكلة انو الداخلية داخلة في حيط و ولات جهاز حزبي كيما في عهد بن علي تسيب الي حاجتها بيه الحكومة و تسيب الي ما حجتهاش بيه، و مخلين السلفين عاملين في خلاها موالاها يتشعبطو حتي على المنڨالة ... وقت هالرهوت تهدد بالقتل و التعنيف و نشر فكرهم المسموم بقوة السواعد و اماول دوليلات البيطرودولار ...

يكمل الجيش الي فالعادة يسميوه سور الوطن و حامي الحمى ... يدخل في عجة التحزب و الفساد السياسي و الحسبات و العقابات، رشيد عمار و جيشو الي كنا عاقدين فيهم النوارة بش يدافعو على حرمة الوطن على الاقل وفاء لشهداء الرّوحية و الذهيبة ، يطلعو فالصو ّو يطيحو تصويرة بناوها على مدى عام لكلها فالماء ...

اما كيما يقولو فيها بڨلة ليها عطينا صدوراتنا للكرتوش و نعاودوها و ما عندنا حتى مزيا، و الي ما حاجتوش بش يدافع على تراب بلادو اقرب مطار و يخلط على بوه الحنين فالسعودية ...

و يدّكم !